21 мая, Мінск /Кар. БЕЛТА/. Беларускі народ заслужыў права "людзьмі звацца" і жыць на сваёй зямлі. Пра гэта 21 мая на цырымоніі ўручэння дзяржаўных узнагарод заслужаным людзям краіны заявіў Прэзідэнт Беларусі Аляксандр Лукашэнка, паведамілі БЕЛТА ў прэс-службе беларускага лідара. "Ганаровыя званні, ордэны і медалі вы атрымліваеце за выдатныя заслугі перад Радзімай і народам. Гэта стымул для яшчэ большых поспехаў у будучыні, - сказаў кіраўнік дзяржавы. - Перакананы, для любога з нас галоўная мэта - дабрабыт і росквіт роднай краіны, шчасце блізкіх і ўпэўненасць у заўтрашнім дні. Бо ўсе мы працуем дзеля гэтага". Як адзначыў Прэзідэнт, дзяржава актыўна развіваецца, на новыя ўзроўні выходзіць эканоміка, сацыяльная, тэхналагічная і вытворчая сферы. "І разам мы здольны дасягнуць любых вышынь, пераадолець любыя цяжкасці", - упэўнены Аляксандр Лукашэнка. Дзяржаўныя ўзнагароды былі ўручаны супрацоўнікам ААТ "Мінскі аўтамабільны завод" вытворчага аб'яднання "БелаўтаМАЗ". "Гэта адно з найбуйнейшых у СНД машынабудаўнічых прадпрыемстваў. Прадукцыя яго вядомая далёка за межамі Беларусі, і попыт на яе расце, асвойваюцца ўсё новыя рынкі. Лічбы гавораць самі за сябе. Аб'ём знешняга гандлю "БелаўтаМАЗа" за 2011 год вырас амаль на 200%", - адзначыў кіраўнік дзяржавы. Паводле яго слоў, складнікі гэтага поспеху - разумная арганізацыя працы, дбайныя адносіны да рэсурсаў, укараненне рацыяналізатарскіх прапаноў. "Грамадскае прызнанне, якое вы па праву заслужылі, павінна стаць арыенцірам для нашых вытворцаў. Ім варта раўняцца менавіта на вас", - падкрэсліў Прэзідэнт. Сярод узнагароджаных таксама прадстаўнікі Савета Рэспублікі Нацыянальнага сходу Беларусі. "Пладна ўдасканальваючы заканадаўчую базу нашай дзяржавы, вы актыўна спрыяеце вырашэнню шырокага кола грамадскіх праблем. Гэта пытанні працоўнай дысцыпліны, занятасці, удасканаленне сістэмы аховы здароўя, ахова мацярынства і дзяцінства, падтрымка таленавітай моладзі. Не застаюцца па-за сферай вашай увагі адукацыя, навука, актывізацыя інтэграцыйных працэсаў і развіццё міжнароднага супрацоўніцтва", - сказаў Аляксандр Лукашэнка.