Беларускі прамыслова-інвестыцыйны форум адкрываецца сёння ў Мінску на пляцоўцы Футбольнага манежа, паведамілі БЕЛТА арганізатары.
Беларускі прамыслова-інвестыцыйны форум - адзін з найбуйнейшых выставачны праектаў у СНД, які аб'ядноўвае некалькі міжнародных спецыялізаваных выставак у галіне навукова-тэхнічнага развіцця і сучасных тэхналогій - "ТэхІнноПрам", "Профзварка", "Хімія. Нафта і газ", "Пластэх". Падчас мерапрыемства таксама пройдуць беларуска-японскі і беларуска-славацкі эканамічныя форумы, індыйска-беларускі дзелавы і тэхналагічны форум.
Як паведамляў намеснік міністра прамысловасці Сяргей Гунько, сёлета мерапрыемствы праходзяць у новым фармаце. "Сёлета мы праводзім форум восенню, раней ён праходзіў у канцы вясны - у маі. У 2019 годзе мы прапанавалі крыху іншую канцэпцыю прамысловага форуму: аб'ядналі яго ў прамыслова-інвестыцыйны, плюс дадаліся сектар эканомікі, нафтагазавая і хімічная, пластыкавая галіны, - адзначыў Сяргей Гунько. - Трэнд форуму: мы завяршаем пяцігодку (2016-2020 гады) і ўступаем у новую, адпаведна, вывучаем кропкі росту, з якімі планамі, прадуктамі і тэхналогіямі будзем уваходзіць у яе".
Праграма форуму ўключае міжнародныя сімпозіумы, канферэнцыі, круглыя сталы па сучасных тэхналогіях і абсталяванні для прамысловага комплексу, перспектывах развіцця адытыўных тэхналогій, прымяненні кампазіцыйных матэрыялаў у нафтахімічнай галіне. Адбудуцца біржа субкантрактаў у прамысловасці, кірмаш інавацыйных распрацовак, кааперацыйная біржа "Навука і прамысловасць - стратэгія інавацыйнага супрацоўніцтва", семінары і прэзентацыі.
Для азнаямлення з экспартным патэнцыялам Беларусі і пашырэння супрацоўніцтва ўдзел у форуме запланавалі дэлегацыі Германіі, Венгрыі, Індыі, Кыргызстана, Малдовы, Польшчы, Партугаліі, Славакіі, Украіны, Расіі.
Мерапрыемствы форуму працягнуцца па 20 верасня.