25 кастрычніка, Віцебск /Вольга Багачова - БЕЛТА/. Дзяржаўная гімназія №8 Віцебска стала першай у вобласці "бяспечнай школай", паведаміла карэспандэнту БЕЛТА дырэктар гімназіі Раіса Грабоўская. Незвычайнасць дадзенай навучальнай установы звязана з з'яўленнем у ёй комплексу "Бяспечная школа", які можна параўнаць па сваіх функцыянальных мэтах з кантрольна-праходным пунктам любога сур'ёзнага прадпрыемства. Так, у склад комплексу ўваходзяць аўтаматычныя турнікеты, агароджа з магчымасцю імгненнай арганізацыі адкрытага проходу (сістэма "антыпаніка"), сістэма кантролю доступу, якая ідэнтыфікуе карты доступу і кіруе турнікетамі, камплект карт доступу на ўсіх вучняў, настаўнікаў і работнікаў школы. Пры ўваходзе і па вонкавым перыметры гімназіі працуюць відэакамеры назірання, што забяспечвае поўны кантроль як унутры навучальнай установы, так і на прылеглай да яе тэрыторыі. Дадзеная сістэма фактычна выключае з'яўленне ў будынку гімназіі старонніх асоб. Бацькі будуць чакаць сваіх дзяцей пасля заняткаў ля ўваходу, а пры неабходнасці сустрэцца з настаўнікам або класным кіраўніком вахцёры выклічуць педагога па гучнай сувязі і толькі ў яго суправаджэнні можна будзе прайсці далей. Комплекс уключае і шэраг іншых карысных опцый. Напрыклад, паслугу sms-апавяшчэння бацькоў аб наведванні дзіцем заняткаў (адпраўка паведамленняў ажыццяўляецца аўтаматычна на мабільны тэлефон бацькі ў момант уваходу і выхаду дзіцяці з будынка школы), яго бягучай паспяховасці і г.д. У цяперашні час у школе вядзецца тэхнічная наладка комплексу, фарміруецца электронная база дадзеных, вырашаюцца іншыя пытанні функцыянальнага забеспячэння яго працы. Плануецца, што ў поўнай меры ў адпаведнасці са сваімі задачамі ён пачне працаваць ужо ў лістападзе. Кошт комплексу складае Br90 млн. Аднак гімназіі №8 ён прадастаўлены бясплатна ў якасці доследнага эксперыменту адным з віцебскіх прадпрыемстваў. Бацькі навучэнцаў аплачваюць толькі па Br20 тыс. за выдачу карткі, пры жаданні - кошт камерцыйнай паслугі sms-апавяшчэння. Таксама ў выпадку псавання комплексу школьнікамі адпаведны рахунак будзе прад'яўлены бацькам хуліганаў.