Сёлета на Віцебшчыне на вадаёмах патанула 24 чалавекі, у тым ліку двое непаўналетніх дзяцей.
Найбольш частай прычынай гібелі людзей на вадзе (больш за палову ўсіх здарэнняў) з'яўляецца купанне ў нецвярозым стане. Усе мы ведаем, што даволі часта адпачынак на вадаёмах у нашых грамадзян суправаджаецца распіццём спіртных напояў, а, як вядома, алкаголь блакуе нармальную дзейнасць галаўнога мозгу. Пад яго ўздзеяннем чалавек не можа кантраляваць свае дзеянні і каардынаваць рухі так, як гэта неабходна для бяспечнага плавання.
Таксама сярод асноўных прычын няшчасных выпадкаў на вадзе – грубае парушэнне правілаў бяспекі. Даволі часта купанне на непрыстасаваных і неабарудаваных для гэтых мэт вадаёмах заканчваецца трагічна. Нямала выпадкаў, калі некаторыя людзі, брававаючы сваім майстэрствам, уплываюць далёка ад берага, ныраюць і скачуць у ваду ў незнаёмых месцах. У выніку такіх дзеянняў можна не толькі загінуць, але і апынуцца на ўсё жыццё прыкаваным да інваліднай каляскі з-за атрыманых траўм пры ўдарах.
То бок мы бачым, што вада сапраўды з'яўляецца небяспечнай стыхіяй, якая не даруе памылак нікому. І пры невыкананні правілаў бяспекі можа патануць і той, хто не ўмее плаваць, і той, хто наадварот добра плавае. Няшчасныя выпадкі могуць адбыцца і на вялікіх, і на малых вадаёмах, а галоўнай прычынай іх узнікнення з'яўляецца чалавечая неабдуманасць.
Меры бяспекі пры купанні
- устрымлівайцеся ад купання ў невядомых і не прызначаных для гэтай мэты вадаёмах, калі няма паблізу абсталяванага пляжу, трэба выбраць бяспечнае месца для купання з цвёрдым пясчаным, не засмечаным дном, паступовым ухілам.
- пазбягайце купання ў адзіночку;
- нельга ўваходзіць у ваду ў стане алкагольнага ап'янення, бо спіртное блакуе сасудазвужальны і сасудапашыральны цэнтр галаўнога мозгу.
- ніколі не скакайце ў ваду ў месцах, не абсталяваных спецыяльна: можна стукнуцца галавой аб дно, камень ці іншы прадмет, лёгка страціць прытомнасць, нанесці сабе траўму і загінуць.
- не дазваляецца ныраць з мастоў, прычалаў, прыстаняў, падплываць да лодак, катэраў і судоў, якія праходзяць побач.
- забараняецца плаваць на надувных матрацах, аўтамабільных камерах (асабліва, калі не ўмееце плаваць). Ветрам ці цячэннем іх можа аднесці вельмі далёка ад берага, а хваляй – захлынуць, з іх можа выйсці паветра, і яны страцяць плавучасць;
- не дапускайце грубых свавольстваў у вадзе: паднырваць пад тых, хто купаецца, хапаць іх за ногі, «тапіць», падаваць ілжывыя сігналы аб дапамозе і г.п.;
- не заплывайце за абмежавальныя знакі, бо яны абмяжоўваюць акваторыю з правераным дном, пэўнай глыбінёй, там гарантавана адсутнасць віроў і г.д. Не трэба адплываць далёка ад берага ці пераплываць вадаём на спрэчку. Даказаць сваё ўменне плаваць можна, праплыўшы некалькі разоў адну і тую ж дыстанцыю паблізу берага;
- не пакідайце дзяцей ля вады без нагляду.
Будзьце пільныя і выконвайце асноўныя правілы паводзінаў на вадзе!
