13 сакавіка, Віцебск /Вольга Багачова - БЕЛТА/. Больш за 200 парушэнняў тэмпературнага рэжыму выяўлена на прадпрыемствах і ў арганізацыях Віцебскай вобласці за люты, паведамілі карэспандэнту БЕЛТА ў камітэце па працы, занятасці і сацыяльнай абароне Віцебскага аблвыканкама. Маніторынг выканання камфортных умоў працы ў перыяд паніжаных тэмператур праводзіцца ў Віцебскай вобласці з канца студзеня. Толькі за мінулы месяц мабільныя групы ў складзе работнікаў сістэмы камітэта па працы, занятасці і сацыяльнай абароне, Віцебскага абласнога цэнтра гігіены, эпідэміялогіі і грамадскага здароўя, гар- і райвыканкамаў праверылі 1057 арганізацый, абследавалі амаль 3 тыс. будынкаў, цэхаў, збудаванняў і аб'ектаў, каля 11 тыс. працоўных месцаў. У ходзе праверак выяўлена 204 факты парушэння тэмпературнага рэжыму, па кожным з якіх прыняты меры рэагавання: выдадзена 169 прадпісанняў, складзена 146 пратаколаў па адміністрацыйных парушэннях, на вінаватых асоб накладзена 129 штрафаў на агульную суму больш за Br34 млн. Акрамя таго, у ходзе праверак выяўлена каля 3,2 тыс. іншых парушэнняў, у тым ліку 18 чалавек знаходзіліся на працоўным месцы ў стане алкагольнага ап'янення. Да работы мабільных груп прыцягваліся таксама дзяржінспектары працы, адзначыў першы намеснік начальніка Віцебскага абласнога ўпраўлення дэпартамента дзяржінспекцыі працы Міністэрства працы і сацыяльнай абароны Сяргей Ануфрыеў. Пры іх непасрэдным удзеле было выяўлена і рэкамендавана да ліквідацыі 1,2 тыс. парушэнняў. Непасрэдна ў момант праверкі службовыя асобы арганізацый прынялі меры да неадкладнага ліквідавання 923 парушэнняў. Па выніках абследавання працоўных месцаў і агляду работнікаў устаноўлена 65 фактаў невыканання работнікамі сродкаў індывідуальнай абароны (СІЗ) і 66 фактаў невыкарыстання СІЗ самімі работнікамі. Па кожным з гэтых фактаў і ў выпадках немагчымасці ліквідацыі такіх парушэнняў у прысутнасці членаў мабільных груп дзяржаўныя інспектары працы давалі рэкамендацыі наймальнікам адхіліць работнікаў-парушальнікаў ад працоўнага працэсу - адхілена 65 работнікаў. Сяргей Ануфрыеў дадаў, што пры правядзенні маніторынгу не засталіся поўнасцю па-за ўвагай і пытанні бяспекі вытворчасці. У выніку выяўлення тэхнікі, якая не адпавядае патрабаванням бяспекі, дзяржінспектары працы забаранілі выкананне 17 відаў работ і эксплуатацыю 42 адзінак абсталявання.-0-

БЕЛТА