Больш за 40 новых аўтобусаў паступяць у школы Віцебскай вобласці да 2019/2020 навучальнага года. На гэтыя мэты было накіравана Br4,6 млн бюджэтных сродкаў, паведаміў карэспандэнту БЕЛТА начальнік галоўнага ўпраўлення па адукацыі Віцебскага аблвыканкама Дзмітрый Хома.
Транспарт набываецца рознай умяшчальнасці, што разам з абнаўленнем схемы аптымальных маршрутаў дазволіць у поўнай меры забяспечыць патрэбы ў падвозе дзяцей і павысіць энергаэфектыўнасць працы аўтапарка за кошт разумнага пераразмеркавання транспарту, адзначыў суразмоўца.
Па вобласці ў новым навучальным годзе ў падвозе мае патрэбу 10,1 тыс. школьнікаў. Для гэтых мэт будзе задзейнічана 267 адзінак транспарту, уключаючы новую тэхніку. У сярэднім у кожны раён набываецца па два аўтобусы. Напрыклад, у Лепельскі ўжо паступіў новенькі школьны аўтобус на 22 месцы і яшчэ адзін меншай умяшчальнасці са спецыяльным пад'ёмнікам для калясачнікаў, які будзе задзейнічаны для падвозу дзяцей, у тым ліку з абмежаванымі магчымасцямі, у мясцовы Цэнтр карэкцыйна-развіваючага навучання і рэабілітацыі. Найбольшая колькасць транспарту (5 адзінак) паступіць у гэтым годзе ў Віцебскі раён, дзе ў падвозе мае патрэбу 690 навучэнцаў.
Усяго за апошнія тры гады школьны аўтапарк Віцебскай вобласці папоўніўся больш чым 120 новымі аўтобусамі.