15 сакавіка, Віцебск /Дзіяна Курыло - БЕЛТА/. З пачатку бягучага года ў Наваполацку зафіксавана больш за дзесяць выпадкаў махлярства з выкарыстаннем сацыяльных сетак, паведаміў карэспандэнту БЕЛТА аператыўнік аддзела крымінальнага вышуку Наваполацкага гарвыканкама Андрэй Лабудзь. Сутнасць гэтага віду махлярства заключаецца ў тым, што злачынцы шляхам падману завалодваюць інфармацыяй аб абаненцкіх нумарах сотавых тэлефонаў пацярпелых, а таксама інфармацыяй аб кодзе, які высылаецца адміністрацыяй інтэрнэт-рэсурсу для актывацыі паслугі па куплі бонусных адзінак, так званых АКоў. Тэхнічна ўсё вельмі проста, і мэта віртуальнага махляра нічым не адрозніваецца ад той, што вырашаюць яго "калегі", якія працуюць непасрэдна ў кантакце з ахвярай: увайсці ў давер і атрымаць патрэбную інфармацыю або грошы. Так, у канцы лютага ў ГАУС звярнулася жыхарка Наваполацка з тым, што невядомая асоба ажыццявіла несанкцыянаваны доступ да яе рахунку абаненцкага нумара і зняла грашовыя сродкі ў суме Br700 тыс. У ходзе праверкі было ўстаноўлена, што незадоўга да гэтага сын заяўніцы, скарыстаўшыся тэлефонам маці, ажыццявіў выхад у Інтэрнэт на сайт "Аднакласнікі" і ўбачыў, што на яго старонку прыйшло смс-паведамленне ад незнаёмай дзяўчыны, у якім яна пыталася "ці патрэбны Акі". Як растлумачыў Андрэй Лабудзь, Акі - гэта балы, дзякуючы якім у "Аднакласніках" можна дасылаць падарункі, паштоўкі і іншыя паслугі. Затым незнаёмка даслала паведамленне аб тым, што нібыта ў цяперашні час праходзіць акцыя і Акі бясплатныя. Ад такой прывабнай прапановы юнак не адмовіўся. Ад незнаёмкі зноў паступіла паведамленне: "На мабільны тэлефон прыйдзе смс, там будзе чатыры лічбы, напішы і дашлі мне іх у "Аднакласніках". Практычна адразу на мабільны тэлефон маці з'явілася паведамленне з нейкага нумара з чатырма лічбамі, якія малады чалавек, як загадала яму незнаёмка, і перавёў у сацыяльную сетку. Пасля гэтага яе старонка была занесена ў "чорны спіс", а на мабільны тэлефон заяўніцы пачалі прыходзіць паведамленні: "Дзякуй, паслуга аплачана. Аднакласнікі". Усяго ў той дзень з тэлефоннага рахунку было зроблена дзесяць аплат, у выніку чаго з рахунку спісана Br700 тыс.