14 сакавіка, Віцебск /Дзіяна Курыло - БЕЛТА/. Бессистэмнае планаванне рэпертуару унітарным прадпрыемствам "Кінавідэапракат" Віцебскага аблвыканкама прывяло да страт ад пракату замежных фільмаў і неефектыўнага выкарыстання бюджэтных сродкаў. Да такіх высноў прыйшлі спецыялісты Камітэта дзяржаўнага кантролю Віцебскай вобласці пасля праверкі прадпрыемства, паведамілі карэспандэнту БЕЛТА ў кантрольным ведамстве. Ва унітарным прадпрыемстве "Кінавідэапракат" устаноўлена, што прадпрыемства не праводзіць аналіз вынікаў пракату кінафільмаў, неэфектыўна і бессистэмна плануе рэпертуар і колькасць фільмаў для закупкі. У выніку бюджэтныя сродкі неэфектыўна выкарыстоўваюцца на закупку імпартнай кінапрадукцыі. Так, з 51 кінафільма, набытага ў 2010 годзе ў Расійскай Федэрацыі за валютныя сродкі, па 36 кінафільмах збор ад іх паказу не пакрыў выдаткаў на набыццё. Выдаткі на гэтыя закупкі склалі каля Br1,4 млрд., а збор ад паказу - каля Br1,2 млрд. У выніку толькі на закупцы замежных фільмаў прадпрыемства страціла Br200 млн. Акрамя таго, прадпрыемства ні разу не паказала фільм "Малышы", які быў набыты ў 2010 годзе за Br20 млн. У 2011 годзе з 33 замежных фільмаў 23 былі стратнымі, канстатавалі ў КДК. Спецыялістамі камітэта ўстаноўлена, што Віцебскі кінавідэапракат завысіў суму выдаткаў у разліку на атрыманне бюджэтных субсідый і залішне атрымаў Br58 млн., якія неабходна вярнуць у абласны бюджэт. У Беларусі падтрымка кінематаграфіі ажыццяўляецца на дзяржаўным узроўні для забеспячэння даступнасці кінамастацтва. Гэтая падтрымка заключаецца ў бюджэтным фінансаванні часткі бягучых выдаткаў дзяржаўных кінавідовішчных прадпрыемстваў, выдаткаў на закупку фільмаў, на правядзенне рамонту і набыццё абсталявання. У 2011 годзе з уступленнем у сілу ўказа ад 3 верасня 2010 года №457 характар дзяржаўнай падтрымкі змяніўся. Сёння сродкі выдзяляюцца зыходзячы з аб'ёму выдаткаў, неабходных для ажыццяўлення культурнай дзейнасці, а таксама даходаў, атрымліваемых ад гэтага віду дзейнасці. Пры гэтым кінавідовішчныя прадпрыемствы атрымалі магчымасць быць прыбыльнымі, бо прыбытковасць прадпрыемстваў не з'яўляецца падставай для памяншэння бюджэтнага фінансавання.