4 верасня, Мінск /Андрэй Асфура - БЕЛТА/. У 2014-2015 гадах плануецца абсталяваць Замкавую гару Браслава. Гэта прадугледжана планам мерапрыемстваў па стварэнні санаторна-турыстычнага комплексу ў Браслаўскім рэгіёне на 2011-2015 гады, распрацаваным Віцебскім аблвыканкамам па даручэнні Савета Міністраў, паведамляе карэспандэнт БЕЛТА. Да 2015 года ў Браславе маюць намер аднавіць фрагменты старажытнага гарадзішча. Акрамя таго, тэрыторыю Замкавай гары плануецца добраўпарадкаваць. На аднаўленне старажытнага гарадзішча і ўладкаванне Замкавай гары будзе выдаткавана Br1,6 млрд. (Br600 млн. будзе выдаткавана ў 2014 годзе, яшчэ Br1 млрд. - у 2015 годзе). Фінансавацца праект будзе з раённага бюджэту. Акрамя таго, у 2011-2014 гадах плануецца распрацаваць і абсталяваць турыстычныя маршруты на аснове ацэнкі прыродных рэсурсаў і гісторыка-культурных каштоўнасцей нацыянальнага парку "Браслаўскія азёры". На гэтыя мэты з рэспубліканскага фонду аховы прыроды плануецца накіраваць Br360 млн.-0-

БЕЛТА