18 мая, Віцебск /Вольга Багачова - БЕЛТА/. Былы начальнік участка Віцебскага камбіната хлебапрадуктаў больш за год выкрадаў з прадпрыемства збожжа. Пра гэта паведаміў сёння на брыфінгу намеснік начальніка 1-га аддзела 9-га ўпраўлення (па Віцебскай вобласці) ГУБВПС МУС Беларусі Вадзім Талпінец. Пры праверцы аператыўнай інфармацыі аб крадзяжах прадукцыі супрацоўнікі ўпраўлення на месцы злачынства затрымалі злачынную групу з шасці чалавек, жыхароў Віцебска і Гарадка, якія спрабавалі выкрасці больш за чатыры тонны збожжа са склада Гарадоцкага хлебапрыёмнага ўчастка ААТ "Віцебскі камбінат хлебапрадуктаў". У ліку затрыманых аказаліся вартаўнік і былы начальнік дадзенага ўчастка 1984 года нараджэння. "Ролі ўдзельнікаў групы ўдакладняюцца. Мяркуецца, што арганізатарам крадзяжоў выступаў былы кіраўнік, злачынствы здзяйсняліся падчас дзяжурства вартаўніка, які ўваходзіць у злачынную групу, а астатнія ўдзельнікі выконвалі функцыі грузчыкаў", - адзначыў Вадзім Талпінец. Паводле наяўнай інфармацыі, зламыснікі дзейнічалі на працягу 2011-2012 года, выкраўшы за гэты час каля 30 т аўса коштам больш за Br20 млн, які затым збывалі ў Расіі. Гарадоцкім раённым аддзелам Следчага камітэта па Віцебскай вобласці ўзбуджана крымінальная справа па ч.2 арт.205 Крымінальнага кодэкса Беларусі (крадзеж, учыненая групай асоб), якая прадугледжвае пакаранне да 4 гадоў пазбаўлення волі. Вядзецца праверка.-0-

БЕЛТА