5 студзеня, Мінск /Кар. БЕЛТА/. Беларуская чыгунка ўкараніла чарговы комплекс электроннай автоблакіроўкі і прылад электрычнай цэнтралізацыі з прымяненнем мікрапрацэсарных тэхналогій на ўчастку Віцебск-Полацк. Пра гэта паведамілі БЕЛТА ў прэс-службе БЧ. Новыя прылады электрычнай цэнтралізацыі ўстаноўлены на станцыях Гараны, Фаміна і Сосніца, а прылеглыя да іх перагоны абсталяваны сучаснымі сістэмамі электроннай автоблакіроўкі з цэнтралізаваным размяшчэннем апаратуры. "На ўчастку Віцебск-Полацк, які з'яўляецца адным з найбольш грузапатрэбных на дарозе, гэта ўжо трэці пускавы комплекс. Аналагічная автоблакіроўка была прыменена на ўчастках Ксты-Наваполацк і Віцебск-Язвіна", - адзначылі ў прэс-службе. Такім чынам, ранейшыя прылады автоблакіроўкі і электрычнай цэнтралізацыі на гэтым участку дарогі цалкам заменены сучаснымі сістэмамі на мікрапрацэсарнай элементнай базе. "У адрозненне ад рэлейных сістэм автоблакіроўкі і электрычнай цэнтралізацыі, новыя сістэмы менш энергетычна ёмістыя і маюць пашыраныя функцыянальныя магчымасці па інтэрвальным рэгуляванні руху цягнікоў", - растлумачылі спецыялісты. Яшчэ адна важная тэхналагічная асаблівасць - цэнтралізаванае размяшчэнне апаратуры. Гэта павышае яе надзейнасць, скарачае час на аднаўленне пры адмовах, а таксама дае магчымасць рэалізацыі больш складаных і эфектыўных алгарытмаў функцыянавання автоблакіроўкі. У БЧ адзначылі, што ўкараненне прылад аўтаматычнай блакіроўкі і электрычнай цэнтралізацыі з'яўляецца адным з прыярытэтных напрамкаў развіцця беларускай стальной магістралі, паколькі прымяненне найноўшых тэхналогій забяспечвае бяспеку руху цягнікоў і павышае аператыўнасць кіравання перавозачным працэсам.-0-

БЕЛТА