У аграгарадку Кіраўская Віцебскага раёна прайшоў фестываль вулічнага мастацтва «Волаты Прыдзвiння». Душэўнасць, пазітыўны настрой свята ўсё тыя ж, а фармат – упершыню абласны.
Па традыцыі фэст прысвечаны 285-сантыметроваму ўраджэнцу мясцовых мясцін, зорцы цырка Фёдару Махнову. Беларускі гігант праславіўся на ўвесь свет. З самай раніцы на шматлікіх тэматычных пляцоўках усё – з махноўскім размахам і каларытам. Ад дэкаратыўнага торта, артыстаў на хадулях у пазнавальным амплуа волата да «смачных» народных падворкаў.
«Не праходзьце міма!» – клічуць з Шапечынскага падворка. На стале – звычайны сняданак гіганта Махнова. Наш Фёдар Андрэевіч быў сціплы ў ежы, дзеліцца Ірына Пастаялкіна, загадчыца аддзялення дзённага знаходжання для грамадзян пажылога ўзросту ў аграгарадку Шапечына ТЦСАН Віцебскага раёна:
– Дваццаць яек, хлеб, 200 грамаў масла, шэсць кубкаў гарбаты – вось яго стандартная ранішняя трапеза. І гэта не фантастыка, а рэальны факт. Каб увасобіць сняданак па-махноўску, мы падрыхтаваліся грунтоўна. Нават хлеб у нашым імправізаваным вулічным кафэ выпечаны на заказ і па асаблівым рэцэпце. Салідная буханка важыць пад 2,5 кілаграма!
У цэнтры ўвагі – незвычайныя гіганцкія арт-аб'екты: ад стылізаваных капелюша і ботаў велікана, рознакаляровых алоўкаў у рост дзіцяці да гіганцкай патэльні з такой жа яечняй. Усё гэта таксама даніна галоўнаму віноўніку ўрачыстасці. Мясцовы жыхар Аляксандр Цяпкоў фатаграфуе сына Арсенія на фоне бутафорскай мега-яечні:
– З такой яўна будзеш сыты (смяецца). Маштабы сёлетніх «Волатаў Прыдзвiння» таксама прыемна здзіўляюць. Упэўнены, такія шыкоўныя святы вельмі патрэбны сельскай мясцовасці! На фэсце мы ўсёй сям'ёй: я, жонка Вікторыя, сыны Арсеній і Іван, дачка Каця. Апошняя нават задзейнічана на адной з пляцовак.
Боты, амаль як у беларускага Гулівера, бярэ ў рукі 13-гадовы Арцём Плісуноў. Вучань Кіраўскай сярэдняй школы здзіўлены:
– Нічога сабе памер! Пра Фёдара Махнова чуў нямала, было цікава. Сёння ўдзельнічаю ў фестывалі не як гледач, а дапамагаю на тэматычнай пляцоўцы.
Са сваёй керамікай прыйшла на свята педагог Наталля Шумовіч:
– Прадстаўляю Альгоўскую яслі-сад-базавую школу. Адмыслова для гэтага цудоўнага фэсту мы зрабілі вялікія і маленькія навінкі – для кантрасту і параўнання. Напрыклад, керамічныя лапці і напёрсткі.
З Оршы адмыслова на «Валатаў Прыдзвiння» прыехалі ўдзельнікі заслужанага аматарскага калектыву Рэспублікі Беларусь узорнай цыркавой студыі «Арэна». Сёлета падчас фестывалю ўпершыню праходзіць конкурс вулічных цыркавых прадстаўленняў. Кіраўнік «Арэны» Алена Жаўненка задаволена прыёмам:
– Ён самы гасцінны! Нашы хлопцы выступаюць па-за конкурсам, але абавязкова пакажам сябе ў Гала-канцэрце, а яшчэ парадуем гледачоў шоу-праграмай.
Ёсць сярод удзельнікаў фестывалю і асаблівы госць. Гэта прыдзвінскі краязнаўца Маргарыта Дзмітрыеўна Юшкевіч. Менавіта яна больш за сорак гадоў таму загарэлася гісторыяй Фёдара Махнова, па крупіцах сабрала звесткі пра яго і выдала ўнікальную кнігу «Легенда пра гіганта з вёскі Касцюкі». Тым самым, па сутнасці нанова «адкрыла» беларускага споліна для нашчадкаў.
Крыніца: vitebsk-region.gov.by
