28 лютага, Віцебск /Дзіяна Курыло - БЕЛТА/. Чацвераногі ратавальнік залічаны ў штат Віцебскага абласнога ўпраўлення МНС, расказаў карэспандэнту БЕЛТА старшы ратавальнік, інспектар-кінолаг пажарнага аварыйна-выратавальнага атрада "Віцязь" Віцебскага абласнога ўпраўлення МНС Павел Семчанка.
Віцебскія ратавальнікі прыступілі да стварэння ўласнай кіналагічнай службы, і першым байцом у новым падраздзяленні стала трохмесячная Прада - палевы лабрадор. Выбар на гэту пароду сабак упаў не выпадкова, растлумачыў Павел Семчанка. Гэта разумныя і паслухмяныя жывёлы. Яны выдатна паддаюцца дрэсіроўцы, прыязныя, што немалаважна для людзей, якія трапілі ў стрэсавую сітуацыю падчас надзвычайнай сітуацыі.
Праду прыкамандзіравалі да атрада "Віцязь". Тут зладзілі спецыяльнае памяшканне, дзе яна зараз жыве, для яе дабудоўваецца вальер, куды шчанюк перасяліцца з надыходам цяпла. Забяспечваць сабаку пайком будуць мясакамбінат і камбінат хлебапрадуктаў - з імі заключаюцца дагаворы на пастаўку прадукцыі да яе стала. А асабісты доктар - супрацоўнік Віцебскай дзяржаўнай акадэміі ветэрынарнай медыцыны, будзе сачыць за станам яе здароўя.
Зараз Прада асвойвае курс маладога байца - вучыцца выконваць простыя каманды "сядзець", "ляжаць", "побач", а крыху пазней яе чакаюць асаблівыя ўрокі. У сабак, якія нясуць службу ў МНС, існуе спецыялізацыя, растлумачыў кінолаг. Адны працуюць на пошук людзей у завалах, іншыя ратуюць людзей на вадзе, на пажарах. Прада будзе працаваць на пошук людзей у лясным масіве. Штогод у лясах вобласці з пачаткам ягаднага сезона губляюцца дзясяткі людзей, сярод іх ёсць і пажылыя людзі, і маленькія дзеці. Да пошуку заблыталых будзе прыцягвацца чацвераногі ратавальнік. Улетку Прада адправіцца на зборы, якія МНС Беларусі рэгулярна праводзіць для кіналагічных службаў сваіх падраздзяленняў.-0-