Чатыры буйныя праекты з удзелам народных майстроў пройдуць сёлета на Міжнародным фестывалі мастацтваў "Славянскі базар у Віцебску". Пра гэта паведаміла сёння на брыфінгу дырэктар Віцебскага абласнога метадычнага цэнтра народнай творчасці Кацярына Лабука, перадае карэспандэнт БЕЛТА.
Традыцыйна адзін з найбольш відовішчных складнікаў форуму звязаны з праектамі, у якіх удзельнічаюць майстры народных рамёстваў. На сёлетнім фестывалі ў спісе асноўных - чатыры. Гэта святы-конкурсы па выцінанцы "Ажурныя мары", традыцыйнай свістульцы "Салавейка-2019", саломкапляценні "Папараць-кветка" і выстава-конкурс майстроў па лоскутнай тэхніцы "Віцебская мазаіка". "Прыём заявак на ўдзел у іх праходзіць на працягу чэрвеня. Чакаецца, што агулам яны збяруць каля 150 майстроў з Беларусі, Расіі, Літвы, Латвіі", - адзначыла Кацярына Лабука.
Паводле яе слоў, кожны з гэтых праектаў па-свойму ўнікальны і прыцягальны, рыхтуе відовішчныя сюрпрызы для гасцей форуму. Напрыклад, на свяце-конкурсе па саломкапляценні ўдзельнікі пад кіраўніцтвам вядомай майстрыхі з Шуміліна Наталлі Сцержанковай сплетуць паўтараметровага саломкавага павука. Зводны нумар "Салаўіная рошча", які імітуе шматгалоссе салаўіных пераліваў, абяцаюць арганізатары на свяце "Салавейка-2019".