19 кастрычніка, Віцебск /Вольга Багачова - БЕЛТА/. У Віцебскай вобласці ў студзені-верасьні бягучага года 14 службовых асоб, у тым ліку адзін кіраўнік арганізацыі, звольнены за парушэнне правілаў аховы працы, што прывяло да выпадкаў цяжкага траўматызму або смяротных зыходаў на вытворчасці. Аб гэтым паведаміў карэспандэнту БЕЛТА першы намеснік начальніка Віцебскага абласнога ўпраўлення дэпартамента дзяржінспекцыі працы Міністэрства працы і сацыяльнай абароны Сяргей Ануфрыеў. Сваіх працоўных месцаў за парушэнні, якія сталі прычынай гібелі або цяжкага траўміравання работнікаў, пазбавіліся службовыя асобы Аршанскага мясакансервавага камбіната, філіяла "Віцебскія электрычныя сеткі" РУП "Віцебскэнерга", ААТ "Наваполацкліфт", КУСГП "Кашчынскае" (Чашніцкі раён), ААТ "Віцебсклес", ААТ "Ліпаўцы" і шэрагу будаўнічых прадпрыемстваў. Як адзначыў Сяргей Ануфрыеў, у вобласці вядзецца пастаянны кантроль за безумоўным скасаваннем наймальнікамі кантрактаў з работнікамі за парушэнне правілаў аховы працы і тэхнікі бяспекі, што пацягнула калецтва або смерць іншага работніка. "Факты нескасавання кантрактаў са службовымі асобамі ў працэсе рэалізацыі патрабаванняў Дырэктывы №1 па названых пытаннях у мінулым перыядзе не зафіксаваны", - сказаў ён. Па выніках праведзеных спецыяльных расследаванняў, за студзень-верасень у стане алкагольнага ап'янэння ў момант няшчаснага выпадку знаходзіліся 12 работнікаў (у тым ліку па няшчасных выпадках са смяротным зыходам - 6). За дапушчанае грубае парушэнне ў адпаведнасці з патрабаваннямі Дырэктывы № 1 ужо скасаваны кантракты з трыма работнікамі розных прадпрыемстваў. Астатнія работнікі, якія атрымалі траўмы, знаходзячыся ў стане алкагольнага ап'янэння, знаходзяцца на лячэнні. Усяго за 9 месяцаў гэтага года дзяржінспектарамі працы абласнога ўпраўлення ў мэтах забеспячэння кантролю за стварэннем працадаўцамі здаровых і бяспечных умоў працы праведзена амаль 1,1 тыс. праверак, у выніку якіх выяўлена 11,6 тыс. парушэнняў. У мэтах бяспекі прыпынялася або забаранялася праца 556 станкоў, машын і іншага абсталявання, 33 цэхаў (участкаў). Па патрабаванні дзяржінспектараў працы адхілены ад выканання работ 1,1 тыс. работнікаў па прычыне таго, што не прайшлі навучанне бяспечным прыёмам і метадам выканання работ, а таксама не забяспечаны неабходнымі сродкамі індывідуальнай абароны.