25 лютага, Мінск /Кар. БЕЛТА/. Дэк декларацыю аб даходах, атрыманых у 2010 годзе, неабходна прадставіць у падатковыя органы не пазней 1 сакавіка 2011 года, паведамілі БЕЛТА ў Міністэрстве па падатках і зборах Беларусі. Гэты абавязак ускладаецца на фізічныя асобы - падатковыя рэзідэнты Рэспублікі Беларусь, якія атрымалі даходы, што падлягаюць падаткаабкладанню. Гэта, у прыватнасці, даходы ад іншых фізічных асоб, у тым ліку ад продажу на працягу 5 гадоў другой кватэры, другога гаража, другога зямельнага ўчастка; ад продажу на працягу каляндарнага года грузавіка, аўтобуса, другой легкавой машыны, продажу акцый іншай фізічнай асобе; а таксама даходы, атрыманыя ў выглядзе дарэння ў суме за год больш за Br17,5 млн. (500 базавых велічынь). Акрамя таго, дэкларацыю неабходна падаваць і ў тым выпадку, калі фізічныя асобы атрымлівалі даходы за мяжой і (або) з-за мяжы Рэспублікі Беларусь; даходы, што перавышаюць устаноўленыя Падатковым кодэксам межы, якія не падлягаюць падаткаабкладанню; даходы ў выглядзе вяртання унёскаў, у тым ліку праіндэксаваных у парадку, устаноўленым заканадаўствам, пры спыненні будаўніцтва кватэр і (або) індывідуальных жылых дамоў, а таксама пры выбыцці з членаў арганізацый забудоўшчыкаў да завяршэння будаўніцтва - у выпадку прымянення ў дачыненні да сум такіх унёскаў маёмаснага падатковага выліку, звязанага з будаўніцтвам і (або) набыццём жылля. Гэта таксама датычыцца і даходаў у выглядзе вяртання страхавых унёскаў пры скасаванні да заканчэння пяцігадовага перыяду дагавораў добраахвотнага страхавання жыцця і дадатковай пенсіі, заключаных тэрмінам на пяць і больш гадоў, - у выпадку прымянення ў дачыненні да сум такіх унёскаў сацыяльнага падатковага выліку, звязанага з заключэннем названых дагавораў страхавання. Грамадзяне, якія атрымлівалі іншыя даходы, утрыманне падатку з якіх не ўскладзена на падатковых агентаў, таксама павінны прадстаўляць дэкларацыю. Акрамя гэтага, дэкларацыю аб даходах, атрыманых у 2010 годзе, маюць права прадставіць фізічныя асобы, якія маюць права на атрыманне падатковых вылікаў (сацыяльных, маёмасных, прафесійных), і абавязак па прадстаўленні такіх вылікаў фізічным асобам ускладзены на падатковыя органы.