Арганізатары абласнога фестывалю-кірмашу працаўнікоў вёскі «Дажынкі-2024» упэўнены, што першы этап свята ў Бешанковічах пройдзе ярка і запамінальна для жыхароў райцэнтра і шматлікіх гасцей.
На брыфінгу для журналістаў старшыня абласнога Савета дэпутатаў Дзмітрый Дзямідаў адзначыў, што падрыхтоўка да свята пачалася год таму, былі распрацаваны комплексныя планы па добраўпарадкаванні, рамонце жылога фонду і сацыяльных аб'ектаў, абнаўленні вулічна-дарожнай сеткі. Як заўсёды, пры падрыхтоўцы сталіцы «Дажынак» ставілася галоўная задача – надаць населенаму пункту новы імпульс у развіцці, зрабіць яго зручным і камфортным для жыхароў. Частка аб'ектаў ужо ўведзена ў эксплуатацыю, іншыя будуць адкрыты падчас правядзення свята. Напрыклад, рэканструяваны стадыён СШ № 1, дзе змогуць займацца фізкультурай і спортам не толькі навучэнцы, але і ўсе жыхары гарпасёлка.
Бешанковіцкі райвыканкам рыхтуе шэраг сюрпрызаў у забаўляльнай праграме «Дажынак» з удзелам творчых калектываў рэгіёна і Віцебшчыны, а таксама запрошаных зорак эстрады.