27 верасня, Віцебск /Дзіяна Курыло - БЕЛТА/. У правядзенні выбарачнага абследавання ўдзельнічаюць 630 асабістых падсобных гаспадарак жыхароў, якія пастаянна пражываюць у сельскай мясцовасці, з 14 раёнаў Віцебскай вобласці, расказаў карэспандэнту БЕЛТА намеснік начальніка Галоўнага статыстычнага ўпраўлення Віцебскай вобласці Аляксандр Разумовіч. Пры правядзенні выбарачнага абследавання прадугледжваюцца два метады збору інфармацыі: правядзенне апытанняў рэспандэнтаў спецыялістамі, якія праводзяць абследаванне, і запаўненне дзённікаў самім рэспандэнтам. Анкеты ўтрымліваюць звесткі аб членах хатняй гаспадаркі, памеры агульнай плошчы зямельнага ўчастка, пасяўных плошчах сельгаскультур, спосабах апрацоўкі зямлі і захоўвання ўраджаю, выкарыстанні угнаенняў, наяўнасці жывёлы і птушкі. Члены хатніх гаспадарак запаўняюць дзённікі ўліку прадукцыі раслінаводства, жывёлагадоўлі, расходу кармоў. Як падкрэсліў Аляксандр Разумовіч, уся атрыманая інфармацыя канфідэнцыйная. Яна неабходная для вывучэння ўзроўню развіцця асабістых падсобных гаспадарак сельскага насельніцтва і ўдасканалення парадку збору інфармацыі аб аб'ёмах вырабленай на прыватных падворках прадукцыі раслінаводства і жывёлагадоўлі. Да апошняга часу органы дзяржстатыстыкі для такога ўліку карысталіся пагаспадаркавым улікам. Аднак практыка паказала, што збор інфармацыі метадам суцэльнага ўліку працаёмкі і нерацыянальны. Разам з тым міжнародная статыстыка мае станоўчы досвед правядзення падобнага ўліку метадам выбарачнага назірання. Ён паспяхова прымяняецца ў краінах СНД і Еўрасаюза. У адпаведнасці з пастановай Саўміна з 1 ліпеня бягучага года ва ўсіх абласцях рэспублікі органамі дзяржстатыстыкі штомесяц праводзіцца выбарачнае абследаванне асабістых падсобных гаспадарак вяскоўцаў. У цэлым па рэспубліцы ў ім удзельнічаюць 3,6 тыс. гаспадарак з 80 раёнаў.-0-

БЕЛТА