26 жніўня, Мінск /Кар. БЕЛТА/. Некаторыя аграгарадкі Беларусі пакуль не дасягнулі належнага ўзроўню жыцця вяскоўцаў. Такі вывад зрабіў Камітэт дзяржаўнага кантролю па выніках праверкі ў шасці раёнах Віцебскай вобласці ўкаранення дзяржаўных мінімальных сацыяльных стандартаў па абслугоўванні сельскага насельніцтва. Пра гэта паведамілі карэспандэнту БЕЛТА ў прэс-службе КДК. Праверка паказала, што, нягледзячы на пэўную працу па ўкараненні сацыяльных стандартаў, іх усюдыіхнае і якаснае выкананне забяспечана не паўсюль, з-за чаго належны ўзровень жыцця вяскоўцаў пакуль не дасягнуты. З году ў год у асобных раёнах не выконваюцца нарматывы ў галіне жыллёва-камунальнай гаспадаркі (па графіку падачы і падтрымання тэмпературы гарачай вады, па тэмпературным рэжыме памяшканняў, па наяўнасці вуліц з удасканаленым пакрыццём), а таксама ў галіне транспарту і сувязі. Напрыклад, у Полацкім і Бешанковіцкім раёнах якасць вады не адпавядае стандартам. У Полацкім раёне 84% проб вады не адпавядалі нарматыўным патрабаванням па ўтрыманні жалеза, што абумоўлена адсутнасцю станцый абезжалезвання на водазаборных збудаваннях. Разам з тым пабудаваныя ў 2005-2006 гадах на тэрыторыі раёна чатыры з пяці станцый абезжалезвання не прыняты ў эксплуатацыю і не функцыянуюць, а ў аграгарадку Жарнасекі станцыя абезжалезвання, пабудаваная ў 2007 годзе, так і не даведзена да нармальнага эксплуатацыйнага рэжыму. Нямала нараканняў у вяскоўцаў выклікае адсутнасць цэнтралізаванай сістэмы водазабеспячэння і каналізацыі ў аграгарадках. Напрыклад, у населеным пункце Рудня Полацкага раёна жыхары (87 чалавек) шасці шматкватэрных дамоў бяруць ваду з водаразборных калонак і студняў, карыстаюцца прыбіральняй на вуліцы. Не выконваўся нарматыў па ўдзельнай вазе вуліц з удасканаленым пакрыццём у Дубровенскім, Сенненскім, Полацкім, Талачынскім раёнах. Адзначаны шэраг недапрацовак пры правядзенні рамонтаў устаноў культуры і адукацыі. Так, у многіх сельскіх школах масава мяняюць старыя драўляныя вокны на новыя вокны з ПВХ, аднак сістэму вентыляцыі пры гэтым не забяспечваюць, у выніку з-за сырасці новыя пластыкавыя вокны пакрываюцца цвіллю.