Да датэрміновае галасаванне на парламенцкіх выбарах стартуе ў Беларусі

Дагаласаванне на выбарах у Палату прадстаўнікоў стартуе сёння ў Беларусі, паведамляе БЕЛТА.

Аддаць свой голас загадзя можна з 6 па 10 верасня з 10.00 да 14.00 і з 16.00 да 19.00. Гэта могуць зрабіць выбаршчыкі, якія ў асноўны дзень выбараў не могуць знаходзіцца па месцы жыхарства. Пры гэтым афіцыйнага пацвярджэння прычын немагчымасці прыйсці ў памяшканне для галасавання не патрабуецца.

Дагаласаванне праводзіцца толькі ў памяшканні ўчастковай камісіі ў прысутнасці не менш як двух яе членаў. Яно не праводзіцца па месцы жыхарства выбаршчыка і на ўчастках для галасавання, утвораных у санаторыях, прафілакторыях, дамах адпачынку, бальніцах і іншых арганізацыях аховы здароўя, якія аказваюць медыцынскую дапамогу ў стацыянарных умовах, для грамадзян, якія адбываюць пакаранне ў выглядзе арышту, а таксама якія знаходзяцца ў лячэбна-працоўных прафілакторыях.

Выбаршчык, атрымаўшы на ўчастку бюлетэнь, распісваецца і пазначае дату дагаласавання. Галасаванне за іншых грамадзян пры наяўнасці ад іх даверанасці не дапускаецца, паколькі ў сілу закона кожны павінен аддаць свой голас асабіста.

Бюлетэнь выдаецца пры прад'яўленні пашпарта грамадзяніна Рэспублікі Беларусь або іншых дакументаў. Да іх аднесены службовае пасведчанне дзяржаўнага служачага, студэнцкі білет, пасведчанне кіроўцы, ваенны білет (для ваеннаслужачых тэрміновай службы), пенсійнае пасведчанне (пры наяўнасці ў ім фатаграфіі), даведка органаў унутраных спраў (для грамадзян, якія страцілі пашпарт), а таксама пасведчанне аб інваліднасці.

У тым ліку прагаласаваць датэрмінова (па мясцовым часе) могуць беларускія грамадзяне, якія знаходзяцца за межамі краіны.

Бюлетэнь запаўняецца галасуючым у кабіне або пакоі для таемнага галасавання. Неабходна паставіць у бюлетэні любы знак у пустым квадраце, размешчаным справа ад прозвішча таго кандыдата, за якога ён галасуе. Пры галасаванні супраць усіх кандыдатаў варта паставіць любы знак у пустым квадраце, размешчаным справа ад радкі "Супраць усіх кандыдатаў".

Калі ж у бюлетэнь унесена прозвішча толькі аднаго прэтэндэнта на парламенцкі пост, то выбаршчык ставіць любы знак у квадраце пад словам "за" або ў квадраце пад словам "супраць".

Грамадзянін, які не мае магчымасці самастойна запоўніць бюлетэнь, мае права запрасіць у кабіну або пакой для тайнага галасавання іншую асобу па сваім меркаванні, акрамя членаў участковай і вышэйстаячых камісій, кандыдатаў у дэпутаты, іх давераных асоб, назіральнікаў, прадстаўнікоў сродкаў масавай інфармацыі. Слабавідучыя могуць скарыстацца наяўнымі ва ўчастковай камісіі павялічвальнымі шкламі (лупамі). Нявідушчыму выбаршчыку, які жадае прагаласаваць самастойна, выдаецца бюлетэнь і спецыяльны трафарэт.

Калі дапушчана памылка пры запаўненні бюлетэня, варта звярнуцца да члена ўчастковай камісіі з просьбай выдаць новы ўзамен сапсаванага.

Для вызначэння вынікаў выбараў у Беларусі выкарыстоўваецца мажарытарная выбарчая сістэма адноснай большасці. Выбары прызнаюцца адбыўшыміся, калі ў галасаванні прыняло ўдзел больш за палову выбаршчыкаў акругі, уключаных у спісы.

Абраным лічыцца кандыдат у дэпутаты Палаты прадстаўнікоў, які атрымаў найбольшую колькасць галасоў. Калі ў бюлетэні значыцца прозвішча толькі аднаго кандыдата, ён лічыцца абраным пры атрыманні больш за палову галасоў электарату.

На сёлетніх выбарах змогуць прагаласаваць 6 990 696 грамадзян краіны. Выбары ў Палату прадстаўнікоў Нацыянальнага сходу Беларусі адбудуцца 11 верасня.

Навіны Беларусі (БЕЛТА)