Даходы ўстаноў фізкультуры і спорту Віцебскай вобласці ад пазабюджэтнай дзейнасці летась выраслі амаль на чвэрць, паведамілі карэспандэнту БЕЛТА ва ўпраўленні спорту і турызму аблвыканкама.
"Прыемна адзначыць, што папулярнасць заняткаў фізічнай культурай і спортам пастаянна расце, у вобласці ўводзяцца новыя аб'екты, якія дазваляюць жыхарам праводзіць свой вольны час цікава і з карысцю для здароўя. Па выніках 2016 года колькасць асоб, якія займаюцца фізкультурай і спортам у рэгіёне, дасягнула 260 тыс. чалавек, або 22% ад агульнай колькасці жыхароў. Такім чынам, гэты важны паказчык дзяржпраграмы развіцця фізічнай культуры і спорту паспяхова выкананы. Акрамя таго, растуць і даходы ўстаноў ад пазабюджэтнай дзейнасці. Летась яны склалі больш за Br5,48 млн, што на 24,3% перавысіла ўзровень 2015-га", - адзначыў начальнік упраўлення Васіль Захарэвіч.
У мінулым годзе было праведзена звыш паўсотні абласных спаборніцтваў і яшчэ мноства гарадскіх і раённых масавых спартыўна-забаўляльных мерапрыемстваў, унутрыгаліновых і міжгаліновых круглагадовых спартакіяд, абласныя спартыўныя святы працаўнікоў вёскі і інш. Удасканальвалася і матэрыяльна-тэхнічная база: уведзены ў строй ФСК "Алімпіец" у Оршы; ФАК са стадыёнам у Сянне і з плавальным басейнам - у Шуміліне; спецыялізаваны зала цяжкай атлетыкі і футбольнае поле з сучасным штучным пакрыццём - у Віцебску; здадзена першая чарга будаўніцтва культурна-аздараўленчага цэнтра ў Лёзне; выкананы капітальны рамонт плавальнага басейна "Садко" ў Наваполацку. Сёлета плануецца ўвесці ў эксплуатацыю новы ФАК "Юнацтва" ва Ушачах, завяршыць капрамонт з мадэрнізацыяй стадыёна Віцебскага дзяржаўнага тэхналагічнага ўніверсітэта і спартыўнага ядра ў Дубровне, выканаць праектныя работы на будаўніцтва спецыялізаванага залы па скачках на батуце ў Віцебску.
Таксама ў сувязі з актыўным развіццём варкаут-руху ў Віцебску вядзецца праца па ўстаноўцы спортпляцовак у дварах. Ва ўстановах адукацыі горада ў 2016 годзе набыта і ўстаноўлена 53 адзінкі вулічных трэнажораў і гімнастычнага абсталявання. ЖРЭТ закупіў 190 трэнажораў, якія вясной будуць устаноўлены ў дварах. Аналагічныя пляцоўкі з'яўляюцца і ў райцэнтрах, а таксама малых населеных пунктах, у тым ліку па праектах Чырвонага Крыжа і міжнароднай тэхнічнай дапамогі.