5 лістапада, Віцебск /Вольга Багачова - БЕЛТА/. Чырвонакніжны шыракапалы рак масава засяліцца 6 лістапада ў азёры Глыбоцкага раёна, паведаміла карэспандэнту БЕЛТА спецыяліст па сувязях з грамадскасцю праекта ПРААН/ГЭФ "Біяразнастайнасць" Ірына Новак. Месцам правядзення прыродаахоўнай акцыі "Захаваем шыракапалага рака ў Беларусі" вызначаны азёры Белае і Млічына, куды будзе выпушчана больш за 300 асобін шыракапалага рака. Дадзеныя вадаёмы былі вызначаны ў ходзе даследавання біялагічнай і ландшафтнай разнастайнасці Глыбоцкага раёна, якое праводзілася па праекце ПРААН/ГЭФ у гэтым годзе. Усяго была вывучана флора і фаўна 36 азёр. Даследаванні паказалі, што на тэрыторыі рэгіёна захавалася толькі адна папуляцыя шыракапалага рака. Асноўнымі прычынамі яго знікнення з'яўляюцца ракавая чума, а таксама змяненне месцапражыванняў у выніку зніжэння ўзроўню паверхневых і грунтавых вод, пагаршэнне якасці вады і г.д. Акцыя "Захаваем шыракапалага рака ў Беларусі" арганізавана па праекце ПРААН/ГЭФ "Інтэграцыя пытанняў захавання біяразнастайнасці ў палітыку і практыку тэрытарыяльнага планавання ў Беларусі" ("Біяразнастайнасць"). Нацыянальнае выканаўчае агенцтва праекта - Міністэрства прыродных рэсурсаў і аховы навакольнага асяроддзя Беларусі. "Дзякуючы таму, што ўжо больш за 30 гадоў шыракапалы рак у Беларусі знаходзіцца пад аховай, у краіне ўдаецца падтрымліваць яго папуляцыю. Аднак для далейшага захавання віду неабходны новыя падыходы. Згодна з праектам ПРААН/ГЭФ "Біяразнастайнасць" будзе апрабавана адно з найбольш перспектыўных рашэнняў па падтрымцы яго папуляцыі - засяленне шыракапалага рака ў патэнцыйныя месцы пражывання", - адзначыла начальнік упраўлення біялагічнай і ландшафтнай разнастайнасці Мінпрыроды Наталля Мінчанка. У сваю чаргу менеджэр праекта ПРААН/ГЭФ "Біяразнастайнасць" Уладзімір Калтуноў падкрэсліў унікальнасць дадзенага мерапрыемства. "Яна заключаецца ў тым, што мы засяляем шыракапалага рака ў так званыя бесстароннія азёры. У выніку новыя папуляцыі будуць у значнай меры абаронены як ад эпідэмій ракавай чумы, так і ад замяшчэння даўгапалым ракам. У далейшым папуляцыі шыракапалага рака Глыбоцкага раёна могуць стаць маткавымі для правядзення маштабных работ па захаванні гэтага віду ў Беларусі", - сказаў ён.