Рэспубліканская навукова-асветніцкая экспедыцыя "Дарога да святыняў", арганізаваная напярэдадні Дня беларускага пісьменства, стартуе 2 верасня ў Мінску. Пра гэта карэспандэнту БЕЛТА паведамілі ў Міністэрстве інфармацыі Беларусі.
Па традыцыі экспедыцыю асвяціць жыватворны агонь з храма Гроба Гасподняга ў Іерусаліме. Адправіўшыся ад Свята-Духава кафедральнага сабора, экспедыцыя пройдзе праз Святое Поле каля вёскі Загор'е ў гарады Баранавічы, Івацэвічы, пасёлак Першамайскі і вёску Малеч Бярозаўскага раёна, гарады Пружаны Брэсцкай вобласці, Свіслач Гродзенскай вобласці, г.п. Вялікая Бераставіца Гродзенскай вобласці, праз Гродна, вёску Верцялішкі Гродзенскага раёна, горад Скідзель. Канечным пунктам прызначэння стане Шчучын, дзе 6 верасня адбудзецца Дзень беларускага пісьменства.
Першымі мерапрыемствамі літаратурнага свята стануць пасадка Сада Малітвы каля храма Святога Міхаіла Архангела, хрэсны ход да храма Богаяўлення і боская літургія ў храме.
XXII Дзень беларускага пісьменства адбудзецца ў Шчучыне Гродзенскай вобласці 6 верасня. Раённы цэнтр упершыню прымае гэтае свята. Дзень беларускага пісьменства па традыцыі праводзіцца ў гістарычных і культурных цэнтрах, з якімі непарыўна звязана жыццё вядомых дзеячаў краіны. У розныя гады свята адзначалася ў Навагрудку, Нясвіжы, Оршы, Пінску, Мсціславе, Міры, Каменцы, Паставах, Шклове, Барысаве, Смаргоні, Хойніках, Ганцавічах, Глыбокім, Быхаве. Два разы урачыстасці прымалі Полацк (1994, 2003), Тураў (1995, 2004), Заслаўе (2000, 2014).
Навіны Беларусі (БЕЛТА)