Ёлачныя кірмашы ў Віцебскай вобласці пачнуць працу з 21 снежня, паведамілі карэспандэнту БЕЛТА ў Віцебскім дзяржаўным вытворчым лесагаспадарчым аб'яднанні (ВГПЛГА).
Усяго лясгасы паўночнага рэгіёну плануюць рэалізаваць каля 50 тыс. навагодніх дрэў. Для зручнасці насельніцтва рэжым працы будзе максімальна працягнуты. У асартыменце гандлёвых кропак традыцыйна будуць елкі, сосны, а таксама ёлачныя букеты і елкі ў кадках. Апошнія летась карысталіся ў насельніцтва падвышаным попытам, таму аб'ём іх рэалізацыі плануецца павялічыць амаль утрая. У сярэднім кошт навагодняга дрэва да 1 м складзе Br10, 1-2 м - Br12, 2-3 м - Br17, 3-4 м - Br30.
У перадсвяточны перыяд для работнікаў дзяржаўнай лясной аховы актуальнай становіцца рэйдавая праца, накіраваная на спыненне незаконных высечак навагодніх дрэў. Будзе арганізавана патруляванне лясоў паблізу населеных пунктаў, дарог і хваёвых маладнякоў. Таксама будуць выстаўлены пасты, у тым ліку сумесныя з работнікамі Дзяржаўтаінспекцыі. У грамадзян, якія перавозяць навагоднія дрэвы, будуць правярацца дакументы, што пацвярджаюць іх набыццё. Актыўна ў перадсвяточныя дні дзяржлясхона мае намер выкарыстоўваць і "лічбавых дазорных" - камеры фота- і відэафіксацыі. "На тэрыторыі ляснога фонду Віцебскага ВГПЛГА дзейнічае звыш сотні камер. З пачатку года з іх дапамогай выяўлена больш за 60 парушэнняў. Найбольш выніковая праца фотапастак адзначаецца ў Віцебскім, Аршанскім, Пастаўскім і Полацкім лясгасах", - падкрэслілі спецыялісты.
У аб'яднанні нагадалі, што самавольная высечка навагодняга дрэва пагражае накладаннем штрафу ад 5 да 50 базавых велічынь (адна БВ - Br25,5).
Для прадухілення збяднення лясоў штогод у Віцебскай вобласці ствараецца амаль 4 тыс. га лясных культур, гэта больш за 14 млн дрэў. Акрамя таго, каб кожны напярэдадні зімовых святаў мог парадаваць сябе і блізкіх водарам лясной прыгажуні, навагоднія дрэвы вырошчваюцца на спецыяльных плантацыях.-0-