"Полымя міру" сустрэлі ў Бярэзінскім біясферным запаведніку, перадае карэспандэнт БЕЛТА.
Агонь II Еўрапейскіх гульняў па тэрыторыі унікальнага запаведніка пранеслі майстар спорту па цяжкай атлетыцы Яўген Шаўчэнка і знакаміты мясцовы жыхар Балотнік - менавіта ён сустракае гасцей у сваіх уладаннях. Маршрут удзельнікаў эстафеты агню прайшоў па дарозе ўздоўж балот да возера Плаўна, дзе знаходзіцца аднайменны гасцінічны комплекс, і па мосце праз Бярэзіну ў вёсцы Броды, размешчанай на стыку Віцебскай і Мінскай абласцей.
Сваімі ўражаннямі з карэспандэнтам БЕЛТА падзяліўся дырэктар Бярэзінскага запаведніка Андрэй Пракашын. "Нашаму калектыву была даверана ганаровая і прэстыжная місія - сустрэць і правесці па сваёй тэрыторыі "Полымя міру". Усёй камандай рыхтаваліся да гэтай адказнай падзеі, а талісман II Еўрапейскіх гульняў Лісянёнак Лесік падчас наведвання запаведніка стаў галоўным героем для мясцовых жыхароў і турыстычных груп. Знамянальная сустрэча з'яўляецца для ўсіх нас дадатковым магутным імпульсам для развіцця", - адзначыў ён.
У Віцебскай вобласці "Полымя міру" ўжо пабывала ў абласным цэнтры, Полацку, Наваполацку, Браславе, Глыбокім. 29 мая агонь II Еўрапейскіх гульняў будуць вітаць у Оршы. Маршрут эстафеты пракладзены так, каб максімальна прадэманстраваць самабытнасць рэгіёна, яго галоўныя славутасці, прыродныя асаблівасці і важныя аб'екты. Затым "Полымя міру" адправіцца ў Магілёўскую вобласць.
II Еўрапейскія гульні пройдуць у Мінску з 21 па 30 чэрвеня. Больш за 4 тыс. атлетаў з 50 краін разыграюць 200 камплектаў узнагарод у 15 відах спорту.