Эстафету "Полымя міру" сустрэлі ў Віцебску

Эстафета агню II Еўрапейскіх гульняў "Полымя міру" пачала свой шлях па Віцебскай вобласці, перадае карэспандэнт БЕЛТА.

Паўночны рэгіён прыняў эстафету ад Гродзенскай вобласці. Першым аб'ектам, які наведаў агонь II Еўрапейскіх гульняў, стала кандытарская фабрыка "Віцьба", затым ён прайшоў па ТАА "Марка".

Першым факеланосцам стала першы намеснік міністра культуры Беларусі Наталля Карчэўская. "Ужо хутка наша краіна стане месцам вялізнага свята - не толькі спартыўнага, але і культурнага. Мяне перапаўняе гонар, што я пранясу агонь II Еўрапейскіх гульняў у культурнай сталіцы Беларусі Віцебску", - адзначыла Наталля Карчэўская.

Віцебская вобласць дэлегавала ў склад зборнай больш за 30 сваіх прадстаўнікоў. "Ва ўсіх у іх ёсць відавочны патэнцыял і чэмпіёнскі характар. Няма сумневу, што ў Мінску яны выступяць годна, прадэманструюць пераможны настрой і сваімі дасягненнямі ўпішуць яркую старонку ў гісторыю Гульняў", - падкрэсліў на цырымоніі старшыня Віцебскага абласнога Савета дэпутатаў Уладзімір Цярэнцьеў.

Факел з агнём II Еўрапейскіх гульняў пабываў практычна ва ўсіх знакавых аб'ектах горада, у тым ліку каля гарадской ратушы, Свята-Успенскага кафедральнага сабора, дома-музея Марка Шагала.

Агонь II Еўрапейскіх гульняў па вуліцах Віцебска пранеслі людзі, добра вядомыя не толькі ў горадзе, але і за межамі Беларусі. Сярод іх - знакамітыя спартсмены, дзеячы культуры і мастацтва, вядомыя ўрачы і грамадскія дзеячы, лепшыя прадстаўнікі самых розных прафесій, сярод якіх народная артыстка Беларусі Святлана Акружная, заслужаны майстар спорту, сярэбраны прызёр Алімпіяды 1980 года Ігар Каныгін, генеральны дырэктар СТАА "Марка" заслужаны работнік прамысловасці Беларусі Мікалай Мартынаў, алімпійская чэмпіёнка Ірына Крыўко.

"Будучы яшчэ ў Рыме, калі адным з першых запальваў агонь, не думаў, што, калі прывязем яго ў Беларусь, гэта будзе настолькі грандыёзная і маштабная падзея. Нас так радасна сустракалі. Але самае прыемнае, што полымя наведала мой родны Віцебск", - прызнаўся алімпійскі чэмпіён па скачках на батуце Уладзіслаў Ганчароў.

Маршрут эстафеты стартаваў з плошчы Свабоды і фінішаваў на плошчы Перамогі. Тут гасцей урачыстасці чакала канцэртная праграма.

Віцебск стаў трэцім абласным цэнтрам, у якім пабывала "Полымя міру". Пасля яго эстафета адправіцца па рэгіёне. 25 мая агонь пабывае ў Полацку каля Сафійскага сабора і Наваполацку, затым ён адправіцца ў Браслаў, ландшафтны заказнік "Ельня", Глыбокае, Беразінскі запаведнік, Оршу. Маршрут эстафеты пракладзены так, каб максімальна прадэманстраваць самабытнасць рэгіёна, яго галоўныя славутасці, прыродныя асаблівасці і важныя аб'екты. Агонь II Еўрапейскіх гульняў будзе падарожнічаць па рэгіёне да 29 мая, затым ён адправіцца ў Магілёўскую вобласць.

II Еўрапейскія гульні пройдуць у Мінску з 21 па 30 чэрвеня. Больш за 4 тыс. атлетаў з 50 краін разыграюць 200 камплектаў узнагарод у 15 відах спорту.

Адначасова з эстафетай "Полымя міру" у Беларусі праходзіць пяты сезон дабрачыннага праекта #velcombegom - міжнародная акцыя "Еўрапейскія забегі". Акцыя накіравана на дапамогу дзецям-спартсменам з абмежаванымі магчымасцямі, якія актыўна займаюцца спортам і ў будучыні будуць абараняць гонар Беларусі на міжнародных спаборніцтвах. За 50 дзён удзельнікам трэба будзе прабегчы рэкордныя 200 тыс. км. Агульная сума дабрачыннай дапамогі ад кампаніі velcom | A1 складзе таксама рэкордныя Br200 тыс. Асаблівасцю "Еўрапейскіх забегаў" стане тое, што ў агульную скарбонку бегавых кіламетраў будзе ўключана дыстанцыя эстафеты "Полымя міру", а таксама вынікі ўсіх лёгкаатлетычных дыстанцый у межах II Еўрапейскіх гульняў.

Кожны, хто хоча дапамагчы дзецям, можа з 12 мая па 30 чэрвеня ў любы зручны для сябе час выходзіць на прабежкі, фіксаваць свае бегавыя вынікі пры дапамозе любога фітнес-прыкладання, усталяванага на смартфон, і дзяліцца імі на сваёй старонцы ў сацыяльных сетках з хэштэгамі #velcombegom, #A1 і #brightteam.

Акцыя "Еўрапейскія забегі" праводзіцца кампаніяй velcom | A1 у партнёрстве з фондам "Дырэкцыя II Еўрапейскіх гульняў 2019 года" пры падтрымцы Міністэрства спорту і турызму і Паралімпійскага камітэта Беларусі.

Навіны Беларусі (БЕЛТА)