Бабініцкі псіханеўралагічны дом-інтэрнат для састарэлых і інвалідаў невыпадкова стаў базай правядзення абласнога навучальнага семінара для кіраўнікоў аналагічных сацыяльных устаноў. Другі год запар ён трымае пальму першынства ў рэспубліцы сярод 92 дамоў-інтэрнатаў. Дзе, як не тут, калегам павучыцца стварэнню дружалюбнага асяроддзя? Гэта неабходна, каб забяспечыць персаналізацыю, выкарыстанне альтэрнатыўнай і дадатковай камунікацыі сярод пражываючых.
– Ужо ў ліпені ўвойдуць у сілу змяненні ў заканадаўстве па пытаннях сацыяльнага абслугоўвання, – нагадала намеснік старшыні камітэта па працы, занятасці і сацыяльнай абароне аблвыканкама Вера Астапенка. – У прыватнасці, дамы-інтэрнаты пераймянуюць у сацыяльныя пансіянаты. Гэта абумоўлена тым, што лад жыцця ў дамах-інтэрнатах у апошнія гады вельмі змяніўся, умовы пражывання наблізіліся да хатніх і санаторных. Пашырыліся функцыі ўстаноў, у іх працу шырока ўкараняюцца новыя напрамкі і тэхналогіі: прафілактыка дэменцыі, рэабілітацыя, абілітацыя, сацыяльны перадых для сем'яў.
Сапраўды, у сучасных дамах-інтэрнатах забяспечваюцца годныя ўмовы пражывання, паўнавартаснае харчаванне, кругласутачны догляд, медыцынская дапамога, даступнае асяроддзе, адпачынак. Выпрацаваны механізмы вырашэння ўсіх пытанняў жыццезабеспячэння і побыту. Настаў час выходзіць на новы ўзровень якасці знаходжання пражываючых у сацыяльных установах.
Думка, чырвонай ніткай якая праходзіла на абласным семінары, заключалася ў тым, каб на першае месца арганізацыі жыццёвай прасторы падапечных будучых сацыяльных пансіянатаў ставіліся эстэтыка, якасць абслугоўвання: прадметы, якія іх атачаюць, захоўваючы свой функцыянал, павінны быць прыгожымі і сучаснымі.
Як гэта можа выглядаць, прадэманстравалі ў Бабініцкім доме-інтэрнаце. На кожным з паверхаў, дзе пражываюць падапечныя, ідэальны парадак і чысціня, адсутнічае візуальны шум. Прадметы асабістага карыстання і гігіены захоўваюцца ў індывідуальных боксах. Увесь тэкстыль падабраны ў адзінай каляровай гаме, дарэчы, пасцельная бялізна, шторы і покрывалы пашыты ў тутэйшай швейнай майстэрні. У інтэр'еры пакояў і холoў ролю яркіх плям гуляюць кветкавыя кампазіцыі з фаамірана і ізалону, вырабленыя на занятках па працоўнай тэрапіі. Кожны куток арганізаваны як прастора для рэлаксацыі або практыкаванняў па падтрыманні кагнітыўных здольнасцей. Так, на крэслах у холах замацаваны аплікатары Кузняцова, з падручных матэрыялаў зроблены немудрагелістыя трэнажоры для ног. А чаго варта СПА-капсула, пілінг рыбкам і лаунж-зона! Асабліва моцна гасцей уразіў экалагічны паверх, дзе ў інтэр'еры выкарыстаны прыродныя матэрыялы.
Дом-інтэрнат з прылеглай тэрыторыяй – гэта цэлы комплекс, дзе ёсць месца для заняткаў фізкультурай, бібліятэка, кіназалы, фітабар... І ніякай казёншчыны! Дом, у якім пражываюць больш за 400 чалавек з множнымі псіханеўралагічнымі засмучэннямі, нагадвае добры санаторый. Такую атмасферу стварылі і ўдасканальваюць супрацоўнікі.
Дырэктар дома-інтэрната Святлана Чэпік расказала, як калектыў рэалізуе ідэі і канцэпцыі па ўкараненні ў наваколле пражываючых прыгажосці і ўтульнасці. Важную ролю ў гэтым адыгрываюць сродкі, выручаныя ад продажу вырабаў, вырабленых у працоўных майстэрнях, падтрымка спонсараў і дабрачынныя акцыі, а галоўнае – дапамога дзяржавы.
Па выніках навучальнага семінара кожны дом-інтэрнат распрацоўвае ўнутраны план мерапрыемстваў. Іх мэта – надаць увагу эстэтычнаму складніку і якасці аказання паслуг у кожным будучым сацыяльным пансіянаце.
vitebsk-region.gov.by
