У Віцебску ў гонар «Славянскага базару» пусцілі трамвай. 16 лютага, у дзень старту продажаў білетаў на 33-і форум, трамвай выйшаў на свой першы маршрут. Такі сюрпрыз падрыхтавалі дырэкцыя фестывалю сумесна з Віцебскім трамвайна-тралейбусным упраўленнем, паведаміў дырэктар Міжнароднага фестывалю мастацтваў «Славянскі базар у Віцебску» Глеб Лапіцкі:
– З пятніцы, 16 лютага, і па нядзелю ўключна фестывальны трамвай, упрыгожаны сімваламі фестывалю – васількамі, будзе хадзіць па маршруце № 1, а з наступнага тыдня пойдзе па маршруце № 6. Чаму 6-ы? Таму што фестываль 33-і, а 3 плюс 3 будзе 6. Яго асаблівасць не толькі ў васільках. На працягу ўсяго маршруту пасажыраў суправаджае голас нязменнай вядучай форуму Алёны Спірыдовіч.
Сапраўды, вядучая, без якой не абыходзіцца «Славянскі базар у Віцебску», агучыла не толькі назвы прыпынкаў, але і ласкава запрашае на ліпеньскі форум:
«Паважаныя пасажыры! Запрашаю вас у фестывальны трамвай. З вамі Алёна Спірыдовіч. І я жадаю вам добрага настрою, прыемных спадарожнікаў і шчаслівых квіткоў. Да сустрэчы на 33-м Міжнародным фестывалі мастацтваў «Славянскі базар у Віцебску»!»
Але нават пасля гэтага пасажыры не вераць сваім вушам, як, напрыклад, Аксана:
– Спірыдовіч? Так, дакладна! Яна! Цікава. Раскажу пра гэта калегам.
Брэндаваны фестывальны трамвай бачны здалёк. Як паведаміла вадзіцель Вольга Шканчикова, з парку выехалі ў 5:49 і адправіліся па маршруце. Цяпер мчыць трамвай «Славянскі базар» па Віцебску, запрашаючы на фестывальныя канцэрты, якія пройдуць з 9 па 15 ліпеня.
Крыніца: vitebsk-region.gov.by