Фізкультурна-аздараўленчы цэнтр Лепеля 16 верасня стаў пляцоўкай для яркай і натхняльнай падзеі — спартыўнага свята, прысвечанага Дню народнага адзінства, аднаму з самых маладых дзяржаўных святаў суверэннай Беларусі.

Удзельнікамі мерапрыемства сталі прадстаўнікі палітычных партый і грамадскіх арганізацый.

Прывітала актывістаў намеснік старшыні райвыканкама, старшыня Лепельскай раённай арганізацыі ГА "Беларускі саюз жанчын" Вераніка Хомбак.

Для ўдзельнікаў была падрыхтавана насычаная праграма спаборніцтваў: эстафеты, конкурсы з бегам і скачкамі, камандныя гульні — усё, што дазваляе праявіць спрыт і хуткасць, а таксама фарміруе камандны дух і адзінства.

Усе ўдзельнікі паказалі годныя вынікі, прадэманстраваўшы ўменне працаваць у камандзе, згуртаванасць, фізічную цягавітасць і сілу духу.

Ва ўпартай і сумленнай барацьбе перамагла… дружба! Усе ўдзельнікі ў падарунак атрымалі абанемент у басейн!