III Форум моладзевых навуковых таварыстваў краін СНД пройдзе сёння ў Віцебскім дзяржаўным медыцынскім універсітэце, паведамілі карэспандэнту БЕЛТА ў ВНУ.
III Форум моладзевых навуковых таварыстваў краін СНД пройдзе сёння ў Віцебскім дзяржаўным медыцынскім універсітэце, паведамілі карэспандэнту БЕЛТА ў ВНУ.
Віцебскі медуніверсітэт у чарговы раз прадаставіць пляцоўку для ўмацавання навуковага і дзелавога супрацоўніцтва маладых вучоных краін СНД. Форум дапаможа сустрэць аднадумцаў і наладзіць кантакты, моладзь зможа абмеркаваць перспектывы інавацый і інвестыцый у медыцынскіх даследаваннях. Чакаецца, што ўдзел у ім возьмуць маладыя вучоныя, выкладчыкі, аспіранты, студэнты і спецыялісты ў галіне арганізацыі работы з моладдзю з Беларусі, Украіны, Казахстана і Расіі - усяго больш за 100 чалавек.
У праграме, у прыватнасці, запланаваны круглы стол па пытаннях павышэння матывацыі моладзі да навуковай дзейнасці ў ВНУ, пошуку інвестыцый у навуку, абмену вопытам, міжнародных навуковых стажыровак і грантаў. "Форум уваходзіць у праграму ХVIII Міжнароднай канферэнцыі студэнтаў і маладых вучоных "Студэнцкая медыцынская навука XXI стагоддзя". У гэтым годзе яна пройдзе 14-15 лістапада і будзе працаваць па 14 секцыях. Да друку падрыхтаваны зборнік з дакладаў канферэнцыі і форуму", - адзначылі ва ўніверсітэце.
Арганізатарамі мерапрыемства выступілі савет маладых вучоных і студэнцкае навуковае таварыства ВДМУ, а таксама Адкрыты ўніверсітэт Скалкава.