23 ліпеня, Мінск /Кар. БЕЛТА/. У Беларусі ў бліжэйшыя гады плануецца пабудаваць шэраг гідраэлектрастанцый сумарнай магутнасцю 230-250 МВт. Пра гэта паведаміў намеснік міністра энергетыкі Беларусі Міхаіл Міхадзюк 22 ліпеня ў Мінску на сустрэчы з журналістамі з краін Еўрасаюза, перадае карэспандэнт БЕЛТА. З улікам таго, што Беларусь з'яўляецца раўніннай краінай, магутнасць плануюемых ГЭС будзе невялікай і складзе ад 17 да 30 МВт. У якасці найбольш буйных праектаў намеснік міністра назваў Гродзенскую ГЭС, якую плануецца ўвесці ў эксплуатацыю ў 2011 годзе. Таксама падпісаны кантракт на будаўніцтва Полацкай ГЭС. Падрыхтавана тэхніка-эканамічнае абгрунтаванне на будаўніцтва Віцебскай ГЭС на рацэ Заходняя Дзвіна і Немнаўскай ГЭС на рацэ Нёман. У сувязі з трансгранічным характарам ракі Нёман і размяшчэннем будучай Немнаўскай ГЭС у непасрэднай блізкасці ад беларуска-літоўскай мяжы ў кастрычніку мінулага года грамадскія слуханні ацэнкі ўздзеяння на навакольнае асяроддзе Немнаўскай ГЭС на рацэ Нёман былі праведзены ў Літве. Па дадзеных Мінпрыроды Беларусі, выкананыя даследаванні і разлікі паказалі, што па асноўных кампанентах навакольнага асяроддзя трансгранічнае ўздзеянне Немнаўскай ГЭС на тэрыторыю Літвы будзе нязначным, распавёў Міхаіл Міхадзюк. Прэс-тур журналістаў з краін ЕС у Беларусь працягнецца па 24 ліпеня. 13 журналістаў прадстаўляюць сродкі масавай інфармацыі з Аўстрыі, Чэхіі, Даніі, Эстоніі, Фінляндыі, Грэцыі, Венгрыі, Італіі, Латвіі, Польшчы, Партугаліі, Румыніі і Вялікабрытаніі. "Мэта візіту - лепш азнаёміць грамадзян дзяржаў - членаў ЕС з канкрэтнымі праектамі, якія ЕС ажыццяўляе ў Беларусі ў рамках Еўрапейскай палітыкі суседства (ЕПС)", - адзначаюць арганізатары візіту.

БЕЛТА