Годам культуры плануецца абвясціць у Беларусі 2016 год

Падрыхтоўваецца праект указа аб аб’яўленні ў Беларусі 2016 года Годам культуры. Пра гэта паведаміла сёння падчас анлайн-канферэнцыі на сайце БЕЛТА першы намеснік міністра культуры Беларусі Ірына Дрыга.

"З ініцыятывай аб’явіць 2016 год Годам культуры выступілі ў першую чаргу творчыя работнікі. Гэтая ініцыятыва не столькі Міністэрства культуры Беларусі, колькі прадстаўнікоў творчых саюзаў", - сказала Ірына Дрыга.

Наступаючы год у сферы культуры - год знакавых юбілеяў, падкрэсліла першы намеснік міністра культуры. Гэта і 125-годдзе з дня нараджэння Максіма Багдановіча, 75-годдзе з дня нараджэння Уладзіміра Мулявіна, юбілеі Кандрата Крапівы, Івана Шамякіна, яшчэ многіх беларускіх літаратараў. Гэта юбілейны год для фестывалю мастацтваў "Славянскі базар" - яму 25 гадоў. Кожная з гэтых падзей, кожная з гэтых асоб вартыя таго, каб выбудоўваць комплексы мерапрыемстваў, лічыць Ірына Дрыга.

Так, адной з першых знакавых падзей цыкла мерапрыемстваў памяці Уладзіміра Мулявіна стане канцэрт 12 студзеня - у дзень нараджэння знакамітага беларуса ў Белдзяржфілармоніі. Падрыхтоўваецца і праект пад творчым кіраўніцтвам жонкі Уладзіміра Мулявіна - Святланы Пінкінай. Гэта будзе арыгінальная праграма, аўтарскі вечар, прадстаўленне твораў, якія былі напісаны самім музыкантам. Плануецца паказ спектакля "Песняр" Нацыянальнага акадэмічнага драматычнага тэатра імя М.Горкага і рок-оперы "Песня пра долю" Нацыянальнага акадэмічнага народнага аркестра Беларусі імя І.Жыновіча не толькі ў Мінску, але і ў іншых гарадах Беларусі.

У будучым годзе запланавана шмат мерапрыемстваў да юбілею Максіма Багдановіча, дадала першы намеснік міністра. Пройдуць розныя акцыі, як напрыклад, "Чытаем Багдановіча разам".

У 2016 годзе будзе актуальная тэма папулярызацыі беларускага мастацтва, яркіх імёнаў беларускай культуры. Будуць адкрыты некаторыя аб'екты культуры пасля рэстаўрацыі. У Слуцку плануецца ўсталяваць помнік легендарнай княгіні Анастасіі Слуцкай.

Новым зместам будуць напаўняцца праекты, якія праводзяцца ў Беларусі не першы год. Так, ужо распрацавана і перададзена на зацвярджэнне кіраўніка дзяржавы новая канцэпцыя "Славянскага базару". "Чырвонай ніткай праходзіць тэма падвядзення творчых вынікаў, вызначэння новых перспектыў развіцця фестывалю. На свяце плануецца прысутнасць многіх зорак, будзе прадстаўлена творчасць лаўрэатаў фестывалю розных гадоў. Рыхтуюцца і сюрпрызы, якія падкрэсліваюць статус фестывалю, яго ролю, значэнне ў развіцці не толькі беларускай культуры (фестываль, несумненна, з'яўляецца сімвалам Беларусі), але і яго ўклад у развіццё сусветнага музычнага мастацтва", - адзначыла Ірына Дрыга.

"Культура - паняцце шматслойнае, азначае яшчэ і ўзгадоўванне, выхаванне. Таму будуць праходзіць мерапрыемствы, якія закрануць культуру парадку на зямлі, культуру на вытворчасці і ў чалавечых адносінах", - падкрэсліла першы намеснік міністра культуры.

Навіны Беларусі (БЕЛТА)