У Віцебскай вобласці 96% навучэнцаў школ і гімназій забяспечаны гарачым харчаваннем, паведаміла журналістам галоўны пазаштатны педыятр галоўнага ўпраўлення па ахове здароўя аблвыканкама Людміла Яцко, перадае карэспандэнт БЕЛТА.
"У Віцебскай вобласці ахоп школьнікаў гарачым харчаваннем высокі - 96%, у сельскай мясцовасці рэгіёну - 100%. Тым не менш не ва ўсіх установах адукацыі ёсць сучасныя харчаблокі, каб рыхтаваць ежу на пару для дыетычнага харчавання. У школах пашырыўся асартымент кісламалочных прадуктаў, сокаў у аднаразовай упакоўцы, знізілася ўдзельная вага страў, якія не адпавядаюць нормам па каларыйнасці. Згодна з правіламі, спосабамі прыгатавання страў пераважна павінны быць запяканне, варэнне і гатаванне на пару", - адзначыла Людміла Яцко.
Па словах спецыяліста, у вобласці на ўзроўні гар- і райвыканкамаў створаны міжведамасныя маніторынгавыя групы. Яны штотыдзень выязджаюць ва ўстановы адукацыі і правяраюць, чым і як харчуюцца школьнікі.
У Віцебскай вобласці агульная захворвальнасць дзяцей хваробамі органаў стрававання з 2010 па 2018 гады скарацілася амаль на 32%. Дашкольнікі і вучні часцей за ўсё пакутуюць захворваннямі органаў дыхання - на іх долю прыпадае 77% у структуры ўсіх недугаў.
Падчас прэс-канферэнцыі таксама звярнулі ўвагу на парушэнні зроку ў дзяцей, траўматызм, камп'ютарную залежнасць. Для іх прадухілення павінны сумесна працаваць бацькі, педагогі і медыкі.-0-