Нядаўна Лепельшчыну наведала армянская дэлегацыя з горада-пабраціма Ташыр. Госці не толькі пазнаёміліся з мясцовымі славутасцямі, але і заключылі дагавор аб далейшым развіцці сяброўскіх сувязяў.
Нядаўна Лепельшчыну наведала армянская дэлегацыя з горада-пабраціма Ташыр. Госці не толькі пазнаёміліся з мясцовымі славутасцямі, але і заключылі дагавор аб далейшым развіцці сяброўскіх сувязяў.
На мяжы раёна прадстаўнікі Арменіі дакрануліся да нашай культуры. Караваем і народнымі песнямі сустрэлі іх лепельскія артысты.
Перспектывы супрацоўніцтва паміж гарадамі ў першы ж дзень прыезду абмеркавалі за круглым сталом у зале пасяджэнняў райвыканкама. Мэр горада Ташыр Эдгар Аршакян, паўнамоцны прадстаўнік губернатара вобласці Лоры ў Рэспубліцы Беларусь Саак Антанесян, начальнік камунальнай службы Нарайр Багдасаран, галоўны спецыяліст па сельскай гаспадарцы Армен Шахбазян – армянскі бок хвалявалі пытанні не толькі эканамічнай, але і культурнай сферы. Пазнаёміўшы са сваёй камандай, старшыня Лепельскага райвыканкама Барыс Ефрэмаў звярнуў увагу на моцныя бакі нашай эканомікі. Адны з іх – трэцяя па магутнасці ў вобласці лесагаспадарчая ўстанова і ААТ «Лепельскі малочнакансервавы камбінат», які экспартуе сваю прадукцыю ў 21 рэгіён.
- Любы дагавор, які заключаецца паміж дзвюма краінамі, павінен пачынацца з духоўнага, - заўважыў паўнамоцны прадстаўнік губернатара вобласці Лоры ў Рэспубліцы Беларусь, прэзідэнт кампаніі UNIECOFOR LLC Саак Антанесян. – І кожны дагавор мае сэнс, калі яго працягам становяцца узаемавыгадныя эканамічныя адносіны. Самае вялікае дасягненне любога дагавора – стварэнне сумеснай прапрыемства. З нашага боку мы зацікаўлены ў куплі сельгас тэхнікі, будаўніцтве супольных прадпрыемстваў па перапрацоўцы лёну на тэрыторыі Арменіі, швейнай вытворчасці. Можам размаўляць аб пастаўцы да вас камянёў, да прыкладу, ферзіта, граніту, а таксама свежых фруктаў і сухофруктаў…
Дамова аб пабрацімстве горада Ташыр і Лепельскага раёна была падпісана яшчэ ў кастрычніку 2012 года, таму ўжо падчас цяперашняга візіту армянскія сябры ўручылі падзякі лепельчанам. Першую з іх атрымаў дэпутат Палаты прадстаўнікоў Нацыянальнага сходу Рэспублікі Беларусь Пётр Шыкшнян. Будучы яшчэ старшынёй райвыканкама, ён рабіў першыя крокі да збліжэння двух бакоў… На Лепельшчыне бываў і іншы чалавек, які стаяў ля вытокаў гэтага міжкультурнага дыялогу: паўнамоцны прадстаўнік губернатара вобласці Лоры ў Рэспубліцы Беларусь Саак Антанесян летась прадстаўляў выставу «Старажытная Арменія – Вечная Арменія». За круглым сталом Саак Сяргеевіч падкрэсліў, што яны гатовыя падтрымаць лепельскую адораную моладзь. «Усяармянская нацыянальная ідэя» - у межах гэтага закрытага клуба яны дапамагаюць дзецям усіх краін. «Я дапамагаю табе, ты ў будучыні дапамагаеш яшчэ двум людзям»,- такім ёсць дэвіз арганізацыі. Да прыкладу, за перамогу ў конкурсе чытальнікаў, сачыненняў і малюнкаў «Арменія маімі вачымі», які прайшоў ужо ў трох гарадах Віцебскай вобласці, хлопчыку, які выканаў на беларускай мове вершы лорыйскага аўтара, Саак Сяргеевіч уручыў гадзіннік. Ён жа і паабяцаў прэміраваць ста доларамі пераможцу конкурсу «Арменія вачымі дзяцей Лепельшчыны», які плануецца правесці ў маі наступнага года.
Пасля ўручэння памятных сувеніраў армянскім гасцям быў паказаны фільм пра Лепельшчыну. У наступныя два дні яны самі змаглі ўбачыць прадпрыемствы і сацыяльныя аб'екты нашага раёна, паказаныя на экране падчас круглага стала. Першым у маршруце дэлегацыі была араматызаваная ферма СПФ «Заазер'е» ААТ «Лепельскі МКК». Наведалі госці і пасёлак, пабудаваны па праграме «Дамы замест Чарнобыля», малочнакансервавы камбінат, хлебазавод, электрамеханічны завод. Азнаёміліся армянскія сябры і з сацыяльнай сферай: пабывалі ў гімназіі імя І. М. Ерашова, ДРАЦ «Жамчужына», ваенным санаторыі, аддзяленні кругласутачнага прабывання пажылых «Свяліца» ТЦСАН. Ацанілі госці і прыгажосць прыроды Беразінскага біясфернага запаведніка. А ў апошні дзень дэлегацыя накіравалася на экскурсію ў Віцебск. Дарэчы, жаданне наведаць гэты горад узнікла невыпадкова: на цяперашнім «Славянскім базары» прадстаўляць Арменію будзе ўраджэнец Ташырскага рэгіёну…
Кульмінацыяй чатырохдзённага візіту армянскай дэлегацыі стала заключэнне новага дагавора ў гуманітарна-культурнай сферы. Старшыня райвыканкама Барыс Ефрэмаў, мэр горада Ташыр Эдгар Аршакян і паўнамоцны прадстаўнік губернатара вобласці Лоры ў Рэспубліцы Беларусь падпісалі яго ў сімвалічным месцы – Доме рамёстваў. Перш чым заключыць пагадненне, госці азнаёміліся з выставачнай экспазіцыяй. Асаблівую іх увагу прыцягнулі калекцыі народных строяў і этнаграфічных вырабаў. Сакраты ткацтва беларускіх паясоў, саломкапляцення і вышыўкі даведаліся армяне з майстар-класаў, праведзеных лепельскімі майстрыхамі. У памяць аб наведванні Дома рамёстваў кожнаму з гасцей уручылі невялікія снапы як сімвал дабра, багацця і будучага супрацоўніцтва. У сваю чаргу, за ўклад у развіццё армяна-беларускага супрацоўніцтва дырэктар Дома рамёстваў Алена Барадзейка атрымала ганаровую грамату і падзяку, падпісаную губернатарам Ларыйскай вобласці. У гэты дзень адбылася і яшчэ адна памятная падзея: адкрылі Кнігу Ганаровых гасцей Дома рамёстваў. Першы запіс у ёй на армянскай мове – пажаданне мэра горада Ташыр Эдгара Аршакяна.
Выстава творчасці лепельскіх майстроў і канцэрт народнага ансамбля жартаўлівай песні «Грымзолі» ў Ташыры, выставы «Мастакі Лоры» і «Мастакі Тавуша» ў Лепелі, а таксама конкурс чытальнікаў, сачыненняў і малюнкаў сярод навучэнцаў устаноў адукацыі «Арменія вачыма дзяцей Лепельшчыны» - у рамках дагавора запланавана шмат цікавых мерапрыемстваў, якія плануецца правесці на працягу года.
Кацярына АСОЎСКАЯ
