2 мая, Мінск /Кар. БЕЛТА/. Дзяржаўная ўстанова па забеспячэнні спартыўных мерапрыемстваў "Белспортабеспячэнне" створана ў Беларусі. Гэта прадугледжана пастановай Савета Міністраў №326 ад 29 красавіка 2013 года, паведамляе карэспандэнт БЕЛТА.
Урад пагадзіўся з прапановай Міністэрства спорту і турызму, узгодненай з зацікаўленымі дзяржаўнымі органамі, аб стварэнні ДУ "Белспортабеспячэнне" шляхам пераўтварэння рэспубліканскага ўнітарнага прадпрыемства па забеспячэнні спартыўных мерапрыемстваў "Белспортабеспячэнне".
Зноў створанай арганізацыі дазволена выступаць у якасці заказчыка (за выключэннем выпадкаў прыняцця Прэзідэнтам Беларусі рашэнняў аб выдзяленні асобным федэрацыям (саюзам, асацыяцыям) па відах спорту бюджэтных сродкаў) пры ажыццяўленні ва ўстаноўленым парадку дзяржаўных закупак. Такія закупкі могуць ажыццяўляцца ў мэтах матэрыяльна-тэхнічнага і арганізацыйнага забеспячэння ўдзелу нацыянальных і зборных каманд Беларусі (за выключэннем тэхнічных, авіяцыйных, ваенна-прыкладных, службова-прыкладных відаў спорту) у міжнародных спартыўных мерапрыемствах за мяжой і патрэб іншых асоб у складзе спартыўных дэлегацый, накіраваных на гэтыя мерапрыемствы. Дазволены такія ж дзеянні для забеспячэння падрыхтоўкі каманд да міжнародных спартыўных мерапрыемстваў за мяжой.
Дзяржзакупкі дазволена фінансаваць для забеспячэння правядзення і садзейнічання ў правядзенні мерапрыемстваў, уключаных у рэспубліканскі каляндарны план афіцыйных спартыўных спаборніцтваў і план рэспубліканскіх фізкультурна-аздараўленчых, спартыўна-масавых і турыстычных мерапрыемстваў, зацвярджаемых Міністэрствам спорту і турызму.
Мінспорта даручана зацвердзіць статут, структуру і колькасць работнікаў дзяржаўнай установы "Белспортабеспячэнне", а таксама ўнесці прапановы па аплаце працы яго работнікаў.
ДУ "Белспортабеспячэнне" створана ў адпаведнасці з падпунктам 5.2 пункта 5 Указа Прэзідэнта Беларусі ад 12 лютага 2004 г. №66 "Аб некаторых мерах па аптымізацыі сістэмы рэспубліканскіх органаў дзяржаўнага кіравання і іншых дзяржаўных арганізацый, падпарадкаваных Савету Міністраў Рэспублікі Беларусь, структуры і колькасці работнікаў дзяржаўных органаў, іншых дзяржаўных арганізацый".
Пастанова ўступае ў сілу пасля яе афіцыйнага апублікавання.-0-