Кожнаму грамадзяніну Беларусі прыйдзе СМС аб пачатку перапісу насельніцтва. Пра гэта ў эфіры тэлеканала СТБ расказала старшыня Нацыянальнага статыстычнага камітэта Беларусі Іна Мядзведзева, паведамляе БЕЛТА.
"Кожнаму грамадзяніну Рэспублікі Беларусь прыйдзе СМС. Прычым там будзе пазначана, хто можа перапісацца (гэта будзе вельмі коратка). І таксама будзе прадастаўлены адрас для інтэрнэт-перапісу. Гэта значыць, можна будзе з мабільнага тэлефона адразу ўвайсці на наш сайт перапісу", - сказала Іна Мядзведзева.
Кіраўніца Белстата адзначыла, што ад перапісу будзе залежаць развіццё канкрэтнага рэгіёна. "Можна будзе прыняць рашэнне аб тым, якія сродкі неабходна будзе накіраваць у ахову здароўя, адукацыю, на будаўніцтва інфраструктуры, жылля, дзіцячых садкоў. Сёння мы праводзім маштабную інфармацыйную працу і спрабуем данесці да ўсіх грамадзян Беларусі тое, што пройдзе гэта мерапрыемства", - падкрэсліла Іна Мядзведзева.
Як паведамлялася, з 4 па 30 кастрычніка ў краіне пройдзе перапіс насельніцтва пад лозунгам "Погляд на сучаснасць - крок у будучыню". Рэспандэнтам будзе прапанавана адказаць на 49 пытанняў, у тым ліку аб асноўных дэмаграфічных і нацыянальна-этнічных характарыстыках, міграцыйнай актыўнасці, адукацыі, крыніцах сродкаў да існавання, занятасці, колькасці дзяцей, жыллёвых умовах, гаспадарчай дзейнасці.
Перапісацца можна будзе адным з трох спосабаў: самастойна і ў зручны час запоўніць анкеты праз інтэрнэт, на стацыянарных участках, у сябе дома падчас вуснага апытання перапісчыка. Інфармацыю аб адрасах стацыянарных участкаў можна будзе знайсці на сайце Белстата. Перапіс праз інтэрнэт стане зручным спосабам для беларусаў, якія часова знаходзяцца за мяжой (калі чалавек пражывае менш за год за межамі краіны, перапісацца ён абавязаны, але гэта могуць зрабіць за яго і паўналетнія сваякі).
У сукупнасці ўсе новыя падыходы да правядзення перапісу дапамогуць скараціць у тры разы колькасць перапіснога персаналу, амаль столькі ж разоў паменшыць час запаўнення перапіснога ліста. І, вядома, павысіць якасць працэдур. Дапаможа пры правядзенні перапісу і спецыяльны кол-цэнтр, у які з 1 кастрычніка можна звярнуцца з любымі пытаннямі па тэме. Ужо працуе промасайт перапісу па адрасах www.перепись.бел і www.census.by, дзе можна азнаёміцца з данымі кампаніі 2009 года і знайсці карысную інфармацыю і парады аб маючай адбыцца падзеі.