24 лютага, Мінск /Кар. БЕЛТА/. Гурт Litesound будзе прадстаўляць Беларусь на конкурсе "Еўрабачанне-2012" у Баку. Адпаведнае рашэнне было прынята сёння па выніках нарады ў Прэзідэнта Беларусі з прычыны таго, што вынікі фіналу конкурсу "Еўрафэст" аказаліся падтасаванымі, перадае карэспандэнт БЕЛТА. "Для мяне галоўнае тут: а) - справядлівасць, б) - Алёна (спявачка Алёна Ланская. - Заўвага. БЕЛТА), якая незаслужана пацярпела. Падставілі чалавека, якая, дарэчы, прынесла нам перамогу на "Славянскім базары", дзе было няпроста і нялёгка, - адзначыў Аляксандр Лукашэнка. - Алёне Ланской трэба прынесці афіцыйныя выбачэнні. Яна абсалютна пацярпелы ў гэтай сітуацыі чалавек. Яна ад душы выступала і імкнулася да гэтай перамогі. Але справядлівасць ёсць справядлівасць. Па тых крытэрах, якія былі вызначаны, перамог гурт Litesound, які і павінен прадстаўляць нашу краіну". "Ёсць іншы варыянт: мы можам гэты конкурс перакрэсліць і паўтарыць. Але, я думаю, гэтага рабіць у дадзенай сітуацыі не варта. Гэта маладыя хлопцы, яны перамаглі, яны і павінны прадстаўляць нашу краіну. Дамовіцеся з імі", - дадаў кіраўнік дзяржавы. Ён таксама канстатаваў: "Сумна, вядома, што нам даводзіцца на ўзроўні Прэзідэнта займацца падобнымі пытаннямі. Але пытанне як раз не ў тым, каб займацца нейкімі еўрафэстамі ці нават конкурсам "Еўрабачанне". Пытанне, якое выносіцца на ўзровень Прэзідэнта, зусім у іншым - пытанне ў справядлівасці". "Я думаю, прысутным тут няма неабходнасці тлумачыць, што стрыжнем усёй маёй палітыкі з'яўляецца пытанне справядлівасці. Гэта галоўнае, гэта пераважае над усімі прынцыповымі крытэрамі дзейнасці суб'ектаў гаспадарання, грамадзян нашай краіны, чыноўнікаў і гэтак далей", - сказаў Аляксандр Лукашэнка. Прэзідэнт адзначыў: "Мы заявілі аб тым, што будзем удзельнічаць у "Еўрабачанні". Гэта было зроблена даўно. І дрэнна-добра, у дзіцячым - лепш, у дарослым, можна сказаць, ніяк, але вынікі нейкія былі. І пытанне, можа быць, тут не столькі ў тым, хоць гэта важна, каб перамагчы. Пытанне ў тым, што ёсць такая краіна Беларусь, цывілізаваная краіна, цэнтр Еўропы, якая прымае ўдзел у падобных міжнародных форумах". -0-

БЕЛТА