26 студзеня, Віцебск /Вольга Багачова - БЕЛТА/. Японія працягне рэалізацыю ў Беларусі гуманітарных праектаў. Аб гэтым заявіў сёння ў Віцебску часовы павераны ў справах Японіі ў Беларусі Сігехіра Міморы падчас цырымоніі падпісання кантракта на выдзяленне гранта для Віцебскага абласнога эндакрыналагічнага дыспансера, перадае карэспандэнт БЕЛТА. Грант у памеры $85,5 тыс. будзе выдзелены ў рамках рэалізацыі праграмы ўрада Японіі "Грантавая дапамога для праектаў па бяспецы насельніцтва" для набыцця УГД-апарата Aloka, прызначанага для вызначэння эндакрыннай паталогіі. Па словах Сігехіра Міморы, пасля аварыі на Чарнобыльскай АЭС урад Японіі, Таварыства Чырвонага Крыжа Японіі і няўрадавыя арганізацыі палічылі неабходным аказваць дапамогу людзям, пацярпелым ад ядзернай катастрофы. Праграма грантавай дапамогі ўрада Японіі ажыццяўляецца ў Беларусі з 2004 года. Праект пастаўкі медыцынскага абсталявання стане 25-м па ліку і першым у Віцебскай вобласці. Усяго на рэалізацыю падобных праектаў былі выдзелены гранты на агульную суму $2,2 млн. для медустаноў Гомельскай, Магілёўскай, Брэсцкай і Віцебскай абласцей. "Урад Японіі і надалей мае намер працягваць супрацоўніцтва з Беларуссю ў галіне гуманітарных праектаў па аказанні дапамогі людзям, пацярпелым ад ядзернай катастрофы", - падкрэсліў дыпламат. Словы шчырай удзячнасці і падзякі за добрую справу ў адрас урада Японіі выказаў намеснік старшыні Віцебскага аблвыканкама Анатоль Дзіулін. "Гэта пацвярджэнне дружалюбных адносін паміж нашымі краінамі. Мы спадзяёмся на далейшае супрацоўніцтва з Японіяй і яе грамадзянамі", - падкрэсліў ён. У цяперашні час на дыспансерным уліку ў эндакрынолагаў Віцебскай вобласці з паталогіямі шчытападобнай залозы знаходзяцца каля 80 тыс. пацыентаў, з іх каля 50 тыс. - людзі з паталогіяй шчытападобнай залозы. Абсталяванне, якое будзе набыта па гранце, дазволіць дыягнаставаць рак шчытападобнай залозы на ранніх стаку і своечасова правесці неабходнае лячэнне, дадала галоўны ўрач Віцебскага абласнога эндакрыналагічнага дыспансера Людміла Педчанец.-0-

БЕЛТА