Фінальны этап рэспубліканскай акцыі МНС "Моладзь за бяспеку" завяршыцца сёння ў Віцебскім гарадскім цэнтры дадатковай адукацыі дзяцей і моладзі восеньскім балам юных ратавальнікаў-пажарных, на які запрошаны лепшыя прадстаўнікі маладзёжнага руху з абласнога цэнтра, Наваполацка, Оршы і Віцебскага раёна, паведамілі БЕЛТА ў абласным упраўленні МНС.
Акрамя юных ратавальнікаў у акцыі прымуць удзел бацькі і педагогі, якія будуць адзначаны і заахвочаны начальнікам Віцебскага абласнога ўпраўлення МНС Сяргеем Мелешкіным. Актыўны ўдзел у свяце возьмуць ветэраны пажарнай службы, якія падзеляцца не толькі прафесійным вопытам, але і ўручаць членскія білеты Беларускай маладзёжнай грамадскай арганізацыі ратавальнікаў-пажарных юным навабранцам. Яркім момантам стане выкананне творчых нумароў ратавальнікамі-пажарнымі, а таксама сумесны з ветэранамі вальс.
Падчас правядзення акцыі "Моладзь за бяспеку", якая стартавала 23 верасня, юныя ратавальнікі-пажарныя Віцебскай вобласці наведалі ветэранаў, інвалідаў, самотных пажылых людзей і аказалі шэфскую дапамогу, пабывалі ў шматдзетных сем'ях, дзе правялі навучальныя мерапрыемствы па бяспецы. Таксама юнакі і дзяўчаты расказалі аб дзейнасці Беларускай маладзёжнай арганізацыі ратавальнікаў-пажарных у сацыяльных прытулках, дамах-інтэрнатах, навучальных установах.
Штогод у маладзёжную арганізацыю ратавальнікаў-пажарных прыходзіць больш за 700 навучэнцаў устаноў адукацыі з усіх рэгіёнаў Віцебскай вобласці. Цяпер у ёй налічваецца больш за 20 тыс. чалавек.