Нават праліўны і даволі непрыемны восеньскі дождж не перашкодзіў народнаму святу ў Лепелі.
Нават праліўны і даволі непрыемны восеньскі дождж не перашкодзіў народнаму святу ў Лепелі.
З самай раніцы цэнтральную плошчу «акупавала» тэхніка. Спачатку – выстава навінак сельскагаспадарчых і прамысловых прадпрыемстваў, ваенная, крыху пазней – чарага самых дзівосных машын: у горадзе прайшоў другі этап адкрытага Кубка Рэспублікі Беларусь па джып-трыяле. Урачыста адкрылася дзіцячая пляцоўка – ад імя ўсіх бацькоў шчырую падзяку мясцовай уладзе за такі шыкоўны падарунак дзетвары выказала мама Алена Знарок. Такога падарунка горад яшчэ не атрымліваў! У парку, на беразе возера, з'явіўся сапраўдны дзіцячы гарадок з мноствам гульнявых, спартыўных і іншых збудаванняў. І гэта толькі пачатак: старшыня райвыканкама Барыс Ефрэмаў паабяцаў, што гульнявая пляцоўка будзе пастаянна папаўняцца новымі забавамі для дзяцей.
Збылася мара не аднаго пакалення лепельчан – практычна, не было той сустрэчы прадстаўнікоў мясцовай улады з насельніцтвам па месцы жыхарства, інфармацыйных груп райвыканкама з працоўнымі калектывамі, дзе б не агучвалася праблема: з дзецьмі ў горадзе падацца няма куды. Дваравыя арэлі-пясочніцы, вядома, патрэбныя, ды толькі гэтага мала... На стварэнне «краіны цудаў» было накіравана амаль 240 мільёнаў рублёў з раённага бюджэту, у кароткія тэрміны ўсю гэту дзіцячую радасць усталявалі і зманціравалі работнікі КУВП ЖКГ «Лепель».
Велізарны фотавернісаж – свайго роду ілюстраваныя рэпартажы з жыцця працоўных калектываў і жыхароў -- расцягнуўся на цэлы квартал. Нямала гледачоў прыцягнула выстава народных рамёстваў і дэкаратыўна-прыкладного мастацтва «Роднаму гораду». Тысячу порцый кашы і гарбаты на паходнай кухні падрыхтавалі кухары сталовых Лепельскага дзяржаўнага прафесійнага ліцэя. Багаццем і шчодрасцю парадавалі падворкі сельскіх Саветаў. І ўсё гэта пад цудоўную музыку ваеннага духавога аркестра.
Праўда, асноўнае дзеянне – урачыстае адкрыццё свята «Табе, наш горад, гэтыя віншаванні!» прыйшлося перанесці з Летняга амфітэатра ў залу раённага Дома культуры. Павіншаваў гараджан і гасцей старшыня раённага Савета дэпутатаў Мікалай Місюра, ганаровы грамадзянін Лепеля генеральны дырэктар Нацыянальнага мастацкага музея Уладзімір Пракапцоў, член Савета Рэспублікі Нацыянальнага сходу Рэспублікі Беларусь рэктар Віцебскага дзяржаўнага ўніверсітэта імя П. М. Машэрава Аляксандр Саладкоў. Удзельнікі мастацкай самадзейнасці ВНУ прывезлі ў Лепель свой падарунак – выдатны канцэрт.
Горад ушанаваў пераможцаў раённага спаборніцтва па добраўпарадкаванні – працоўны калектыў «Лепельрайгаза», выдатных уладальнікаў прыгожых і дагледжаных сядзіб – Людмілу Геут, Валянціну Шасцітко і Валянціну Асіпенка.
Увечары эстафету на радасць гараджанам прынялі дуэт «Колер алоэ» і гурт «Nevesta», танцавальная праграма «Добры вечар, мой горад!». Па традыцыі начное неба над Лепелем расфарбаваў святочны феерверк.
Алена Целятко.
На здымках: дождж святу не перашкода; дзіўны дзіцячы гарадок – выдатны падарунак лепельскім дзяўчынкам і хлопчыкам, а таксама іх бацькам.
Фота аўтара.