У Медыяцэнтры Віцебскай вобласці на прэс-канферэнцыі абмеркавалі падрыхтоўку і правядзенне ў Віцебску навагодніх святочных мерапрыемстваў.
– У Віцебску запланавана шмат святочных навагодніх мерапрыемстваў. 13 снежня а 18.00 на плошчы Перамогі заззяе агнямі цэнтральная ёлка абласнога цэнтра, пройдуць традыцыйнае шэсце Дзядоў Марозаў і Снягурак, казачных персанажаў, а таксама святочнае прадстаўленне для гараджан і гасцей горада, розыгрыш гарадской латарэі, – расказаў намеснік старшыні гарвыканкама Віктар Глушын. – Акцыі «запальвання» ёлак таксама пройдуць у мікрараёнах горада. У Чыгуначным раёне – 13 снежня а 16.00 у скверы на вул. Кірава, у Кастрычніцкім раёне – 17 снежня а 15.30 у скверы «Студэнцкі», у Першамайскім раёне – 20 снежня а 16.00 на пляцоўцы ля Лядовага палаца. 16 снежня стартуе рэспубліканская акцыя «Нашы дзеці». У гэты дзень у Віцебску пройдзе абласное святочнае мерапрыемства для дзяцей з усёй вобласці.
З 26 снежня 2024 г. па 15 студзеня 2025 г. пройдзе навагодняя дабрачынная акцыя для пажылых людзей «Ад усёй душы». Маштабныя мерапрыемствы на пл. Перамогі і ў мікрараёнах пройдуць 25 снежня, 1 студзеня, 2, 4, 5, 7 студзеня 2025 г. На плошчы Перамогі ў навагоднюю ноч з першай да трэцяй пройдзе навагодняя праграма і святочны феерверк. З 16 снежня 2024 г. да 8 студзеня 2025 г. у глядзельнай зале Канцэртнай залы «Віцебск» адбудзецца Навагодні мюзікл-прыгода «Цуды без чараўніцтва», з 17 снежня 2024 г. па 2 студзеня 2025 г. – Навагодняя казка-гульня «Карабас-Барабас супраць Новага года». Падрабязная інфармацыя пра ўсе навагоднія мерапрыемствы будзе апублікавана ў гарадской афішы.
– Пасля Новага года ў Віцебску пройдзе традыцыйнае свята духоўнай музыкі, якое запланавана на 7-8 студзеня, а таксама VI Міжнародны фестываль-конкурс «Арт-парад у Віцебску», – анансаваў намеснік старшыні гарвыканкама.
Аб'екты гандлю Віцебска актыўна рыхтуюцца да навагодняга свята.