Адкрытае абласное свята духоўнай музыкі пройдзе ў Віцебску 7-8 студзеня, паведамілі карэспандэнту БЕЛТА ў Віцебскім абласным метадычным цэнтры народнай творчасці.
Адкрытае абласное свята духоўнай музыкі пройдзе ў Віцебску 7-8 студзеня, паведамілі карэспандэнту БЕЛТА ў Віцебскім абласным метадычным цэнтры народнай творчасці.
"Мы чакаем шмат гасцей не толькі з усёй вобласці, але яшчэ з Расіі. Усяго за два дні свята публіка пачуе выступленні каля 25 калектываў. У першы дзень у асноўным прагучыць акадэмічная, камерная духоўная музыка. На другі дзень рэпертуар будзе шырэйшы. У выкананні дарослых і дзіцячых акадэмічных хароў і ансамбляў, салістаў-вакалістаў і салістаў-інструменталістаў прагучаць не толькі каноны, але і песні на калядныя матывы, калядныя, народныя песні, музычныя нумары аркстравых калектываў", - адзначыла галоўны хормайстар Віцебскага абласнога метадычнага цэнтра народнай творчасці Дар'я Лабука.
У прыватнасці, на сцэне Нацыянальнага акадэмічнага драматычнага тэатра імя Якуба Коласа выступяць народны жаночы камерны хор Цэнтра культуры Наваполацка, народная харавая капэла з Глыбокага, узорны дзіцячы хор Ушацкай ДШМ, а таксама шэсць вядучых калектываў Віцебска. Яркай старонкай канцэртнай праграмы стане выступленне гасцей з Масквы і Сергіева Пасада, Санкт-Пецярбурга, Нефцеюганска. І на мажорнай ноце завершыць першы дзень струнны аркестр дзіцячай школы мастацтваў ім. С. Рыхтэра пад кіраўніцтвам Васіля Гладыша (Масква). А 8 студзеня свята перамесціцца ў Духоўную семінарыю і на сцэну Віцебскага дзяржаўнага музычнага каледжа імя І. Салярцінскага. Тут адбудуцца выступленні калектываў з Віцебска і райцэнтраў рэгіёна.
Свята праводзіцца з 1993 года і аб'ядноўвае лепшых выканаўцаў духоўнай музыкі з Віцебска, Наваполацка, Ушацкага, Лепельскага, Бешанковіцкага, Полацкага і іншых раёнаў Віцебскай вобласці, а таксама гасцей з Расіі.
Арганізатарамі мерапрыемства выступаюць галоўнае ўпраўленне ідэалагічнай работы, культуры і па справах моладзі Віцебскага аблвыканкама, абласны метадычны цэнтр народнай творчасці, аддзел ідэалагічнай работы, культуры і па справах моладзі Віцебскага гарвыканкама, дзіцячая школа мастацтваў №1 Віцебска.