19 кастрычніка, Мінск /Алена Прус - БЕЛТА/. Кожнае трэцяе звароцце ў Міністэрства працы і сацыяльнай абароны датычыцца пытанняў пенсійнага забеспячэння. Пра гэта паведамілі карэспандэнту БЕЛТА ў міністэрстве. У студзені-веражні бягучага года асноўнымі пытаннямі, узнятымі ў пісьмовых зваротах грамадзян, былі пытанні пенсійнага забеспячэння (33,3%). У параўнанні з аналагічным перыядам мінулага года колькасць зваротаў аб разліку памераў пенсіі вырасла ў 1,8 раза, аб выплаце пенсій - у 1,5 раза. Па словах спецыялістаў, рост колькасці зваротаў па гэтай тэматыцы звязаны перш за ўсё з устанаўленнем узроставых даплат людзям старэйшым за 75 гадоў з 1 студзеня гэтага года, а таксама з пераразлікамі пенсій і выплат да іх (з 1 лютага, 1 мая, 1 жніўня праведзены пераразлікі працоўных пенсій з улікам росту сярэдняй заработнай платы работнікаў, з гэтых жа дат з улікам росту бюджэту пражыткавага мінімуму ў сярэднім на душу насельніцтва былі пералічаны надбаўкі, павышэнні і даплаты, устаноўленыя да пенсій асобных катэгорый пенсіянераў). Пры гэтым паменшылася колькасць пісьмовых зваротаў за тлумачэннем пенсійнага заканадаўства, аб праве на пенсію (у тым ліку датэрміновую), прапаноў па ўнясенні змяненняў у нарматыўныя прававыя акты па пытаннях пенсійнага забеспячэння. У параўнанні са студзенем-вераснем 2011 года вырасла колькасць пісьмовых зваротаў па пытаннях працоўнага заканадаўства - на 7,1%. У міністэрстве адзначылі, што на 25,6% знізілася колькасць зваротаў па пытанні прадастаўлення гарантый, кампенсацый і льгот. Дарэчы, гэтая тэматыка лідзіравала ў 2010-2011 гадах. Знізілася і колькасць зваротаў аб аказанні матэрыяльнай дапамогі. А колькасць пісьмовых зваротаў па пытаннях прадастаўлення дзяржаўнай адраснай сацыяльнай дапамогі (ГАСД) вырасла. Гэта звязана са ўступленнем у сілу з 1 красавіка гэтага года заканадаўчага акта, якім былі ўведзены новыя віды ГАСД, - за тлумачэннем асобных пытанняў прадастаўлення такой падтрымкі пераважна і звярталіся заяўнікі.