Нацыянальны акадэмічны драматычны тэатр імя Якуба Коласа ў свой дзень нараджэння 21 лістапада пакажа прэм'еру спектакля "Мая жонка - хлусня" па аднайменнай п'есе амерыканскага драматурга Маргарэт Мэйо, паведамілі БЕЛТА ў тэатры.
Для прэм'еры тэатр выбраў літаратурны матэрыял моцнай вытрымкі. Камедыям Маргарэт Мэйо больш за сто гадоў. Сама яна - легенда амерыканскага сцэнічнага мастацтва. Мэйо паспрабавала сябе ў ролях актрысы, драматурга, рэжысёра і прадзюсара. Для Еўропы "Мая жонка - хлусня" адаптаваў французскі драматург Марцін Эннекен.
"Камедыя распавядае гісторыю, якая можа адбыцца ў кожнай сям'і. Варта зманіць толькі раз, і адна, няхай нават нявінная, хлусня здольная зацягнуць вас у неверагодны кругазварот падзей, хітраспляценняў, з якіх складана знайсці годнае выйсце. Не хадзіце ў рэстаран з чужой жонкай, інакш узнікнуць праблемы. Яны і ўзніклі ў сям'і Уільяма і Кэці. Але больш глыбокая прычына сварак іншая - у Кэці і Уільма няма дзяцей. Пасля чарговага падману і вялікага скандалу муж сыходзіць з дома. Каб вярнуць каханага, Кэці наважваецца на грандыёзны падман, падказаны сяброўкай", - адзначылі ў тэатры.
Пераклад, пастаноўка і музычнае афармленне Міхаіла Краснабаева. Сцэнаграфія Святланы Макаранка.
Акунуць у атмасферу камедыі віцебскія артысты. У спектаклі занятыя Цімур Жусупаў, Вікторыя Шамардына, Арцём Блахін, Святлана Сухадолава, Раіса Грыбовіч, Вольга Куляшова, Яўген Бераснёў, Юрый Цвірко, Вадзім Асветінскі, Герман Дымарэцкі, Тамара Краснабаева-Чарняк і Анжаліка Баркоўская.