Кампанія "Марка" выпусціла першыя ўзоры лыжных чаравікоў, паведаміў карэспандэнту БЕЛТА генеральны дырэктар Беларускай гарбарна-абутковай кампаніі "Марка", сенатар Мікалай Мартынаў.
Кампанія "Марка" выпусціла першыя ўзоры лыжных чаравікоў, паведаміў карэспандэнту БЕЛТА генеральны дырэктар Беларускай гарбарна-абутковай кампаніі "Марка", сенатар Мікалай Мартынаў.
Мадэльны шэраг прадстаўлены 18 паўпарамі для двух распаўсюджаных відаў мацавання, розных па сваім знешнім выглядзе і тэхнічным увасабленні. Першыя ўзоры былі выраблены ў эксперыментальным цэху структурнага падраздзялення холдынгу: на нядаўна мадэрнізаваным прадпрыемстве "Вердзімар" (г.Белаазёрск, Брэсцкая вобласць).
У бліжэйшыя дні ўзоры будуць накіраваны ў Міністэрства спорту і турызму, дзе атрымаюць экспертную ацэнку. Будуць таксама вызначаны мадэлі, якія трэба будзе паставіць на паток. Пакуль жа сваім меркаваннем аб першых лыжных чаравіках айчыннай вытворчасці з журналістамі і кіраўніком кампаніі падзяліўся заслужаны трэнер БССР па лыжных гонках Аляксандр Саланенка. "Добры абутак для класічнага ходу. Выдатна падыдзе для аматараў, юных і маладых спартсменаў. Упэўнены, ён будзе запатрабаваны ў выхаванцаў вучэльняў алімпійскага рэзерву і дзіцяча-юнацкіх спартыўных школ", - падкрэсліў ён. Канструктыўныя заўвагі датычыліся цвёрдасці падэшвы, задніка, некаторых іншых элементаў, істотных для спартсменаў. Іх Мікалай Мартынаў паабяцаў улічыць і дапрацаваць не толькі пры падрыхтоўцы мадэляў да серыйнага запуску, але і ў масавай вытворчасці спартыўнага абутку. "Гэта не запатрабуе затрат, толькі палепшыць якасць нашага абутку", - падкрэсліў кіраўнік холдынгу.
"Гэта наш першы крок. Пачатак пакладзены. Да наступнага года мы ўлічым усе нюансы і пастараемся перайсці на наступны ўзровень - выпусціць лыжныя чаравікі для прафесійных спартсменаў. Для гэтага трэба больш глыбока прапрацаваць гэтую тэму", - адзначыў гендырэктар.
Мікалай Мартынаў дадаў, што серыйны выпуск плануецца пачаць восенню, каб пад патрэбы агульнаадукацыйных школ, спартыўных устаноў выпусціць да лістапада каля 40 тыс. пар абутку. Далейшы аб'ём будзе фарміравацца ў адпаведнасці з попытам. Прагназуемы кошт пары складзе прыкладна Br35-65 у залежнасці ад матэрыялу верха.