9 студзеня, Віцебск /Дзіяна Курыло - БЕЛТА/. Дзяржава здзейсніла адчужэнне шляхам продажу акцый ААТ "Аршанскі авіярамонтны завод" стратэгічным інвестарам - закрытаму акцыянернаму таварыству "Сістэмы інвестыцый і інавацый" (Беларусь) і публічнаму акцыянернаму таварыству "Матор Січ" (Украіна). Распараджэнне №335рп ад 30 снежня 2011 года аб адчужэнні акцый падпісана Прэзідэнтам Рэспублікі Беларусь, паведаміў карэспандэнту БЕЛТА дырэктар ААТ "Аршанскі авіярамонтны завод" Уладзімір Троіцкі.
Ва ўстаўным фондзе ААТ "Аршанскі авіярамонтны завод" дзяржаве належала 99,2% акцый, 0,8% акцый знаходзіліся ва ўласнасці працоўнага калектыву прадпрыемства. Дзяржаўны пакет цалкам прадаецца інвестарам: ЗАТ "Сістэмы інвестыцый і інавацый" становіцца ўладальнікам 1 488 171 акцыі, ПАТ "Матор Січ" прадаецца 2 232 256 акцый (каля 60%).
Інвестары бяруць на сябе абавязацельствы на працягу 2012-2016 гадоў укласці ў рэканструкцыю, мадэрнізацыю вытворчых магутнасцей не менш за $12 млн., стварыць звыш 300 працоўных месцаў. Акрамя таго, на працягу двух гадоў з дня заключэння інвестыцыйнага дагавора новыя ўладальнікі прадпрыемства павінны правесці рэканструкцыю двух інтэрнатаў Аршанскага авіярамонтнага завода, а таксама накіраваць на працягу пяці гадоў каля Br20 млрд. у сацыяльна-эканамічнае развіццё пасёлка Балбасава.
ЗАТ "Сістэмы інвестыцый і інавацый" да красавіка 2012 года павінна прадставіць у Саўмін комплексную канцэпцыю стварэння лагістычнага цэнтра з выкарыстаннем магчымасцей аэрадрома Орша.
Савету Міністраў даручана ў месячны тэрмін забяспечыць заключэнне дагавораў куплі-продажу акцый, інвестыцыйнага дагавора паміж Рэспублікай Беларусь у асобе Міністэрства транспарту і камунікацый і ЗАТ "Сістэмы інвестыцый і інавацый" і ПАТ "Мотор Січ".
На думку Уладзіміра Троіцкага, прыход аднаго з найбуйнейшых вытворцаў рухавікоў для авіяцыйнай тэхнікі, якім з'яўляецца ўкраінская кампанія "Мотор Січ", дазволіць авіярамонтнаму заводу ўмацаваць пазіцыі вядучага прадпрыемства па рамонце верталётаў і стабілізаваць фінансава-эканамічнае становішча.
Аршанскі авіярамонтны завод створаны ў 1941 годзе. У канцы 2009 года прадпрыемства акцыянавана. Завод з'яўляецца ўладальнікам сертыфіката Авіяцыйнага рэгістра Міждзяржаўнага авіяцыйнага камітэта, які сведчыць аб адпаведнасці Аршанскага авіярамонтнага завода патрабаванням Авіяцыйных правілаў, стандартаў і рэкамендацый ІКАО, міжнародных стандартаў ІСО серыі 9000, а таксама правілаў JAR-145 і EAR-145. Аршанскі авіярамонтны завод мае сертыфікат Расійскіх федэральных авіяцыйных правілаў ФАП-145Р на права выканання капітальнага рамонту верталёта Мі-8. Тэмп росту вытворчасці прадукцыі ў супастаўных цэнах у 2011 годзе да 2010 года склаў 113%, тэмп росту выручкі ў супастаўных цэнах - 130%. Па выніках года прадпрыемства здолела выйсці на бестурботную працу.
ПАТ "Матор Січ" - адзін з найбуйнейшых сусветных вытворцаў рухавікоў для авіяцыйнай тэхнікі, а таксама прамысловых газатурбінных установак. Пастаўляе прадукцыю ў 106 краін свету. У агульным аб'ёме экспарту прадпрыемства каля 30% складае доля Расійскай Федэрацыі. "Матор Січ" забяспечвае больш чым на 80% патрэбнасць авіяпрама РФ у верталётных рухавіках.-0-
БЕЛТА