5 снежня, Віцебск /Вольга Багачова - БЕЛТА/. У Віцебску 8 снежня будзе дадзены афіцыйны старт шэрагу мерапрыемстваў I Студэнцкага славянскага форуму, паведаміла карэспандэнту БЕЛТА прарэктар па выхаваўчай рабоце Віцебскага дзяржаўнага ўніверсітэта імя П.М.Машэрава Ірына Бондал. У гэты дзень у канцэртнай зале "Віцебск" адбудзецца вялікі канцэрт-прэзентацыя, у якім возьмуць удзел кіраўніцтва і творчая моладзь васьмі ВНУ Віцебскай і Смаленскай абласцей: Полацкага дзяржаўнага ўніверсітэта (ПДУ), Віцебскага дзяржаўнага тэхналагічнага ўніверсітэта (ВГТУ), Віцебскага дзяржаўнага ўніверсітэта імя П.М.Машэрава, Віцебскай акадэміі ветэрынарнай медыцыны, Віцебскага дзяржаўнага медыцынскага ўніверсітэта, Смаленскага дзяржаўнага ўніверсітэта, Смаленскай медыцынскай акадэміі і Смаленскай акадэміі фізічнай культуры, спорту і турызму. Прывітанні ўдзельнікам канцэрта накіруе таксама Днепрапятроўскі нацыянальны ўніверсітэт імя А.Ганчара (Украіна), прадстаўнікі якога не змогуць прыехаць у Віцебск. Творчы канцэрт будзе складацца з 15-хвілінных візітовак кожнай з устаноў адукацыі, у якой студэнты паспрабуюць максімальна ярка і поўна прадставіць культурнае, спартыўнае і навуковае жыццё сваёй alma mater. "Дадзенае мерапрыемства адкрые сабой цэлы шэраг культурных, навуковых і спартыўных падзей, якія аб'яднаюць у бліжэйшы час віцебскія і смаленскія ВНУ", - адзначыла Ірына Бондал. Яна падкрэсліла, што культура, навука і спорт - гэта тры кіты, на якіх будзе будавацца супрацоўніцтва ўсіх ВНУ - удзельнікаў Студэнцкага славянскага форуму, а яго галоўным прынцыпам вызначана бесперапыннасць студэнцкіх зносін. З гэтай мэтай са студзеня па красавік 2013 года студэнцкая моладзь будзе прымаць удзел у сумесным навуковых канферэнцыях, культурных і спартыўных мерапрыемствах. З беларускага боку ВНУ - каардынатарам усіх праектаў выступае ВДУ імя П.М.Машэрава, з расійскага - Смаленскі дзяржаўны ўніверсітэт. Вынікі ўсіх гэтых сустрэч будуць падведзены ў апошняй дэкадзе мая ў Віцебску на з'ездзе I Студэнцкага славянскага форуму. Там жа вызначацца планы па далейшых праектах. "Студэнцкі славянскі форум з'яўляецца адкрытым, таму далучыцца да яго могуць і іншыя ВНУ розных краін", - падкрэсліла Ірына Бондал.