2 лістапада, Віцебск /Сяргей Кочатаў - БЕЛТА/. Студэнткі з аграрных ВНУ чатырох краін прымуць удзел у фінале міжнароднага міжвузаўскага конкурсу "Міс СНД-2011", які пройдзе 4 лістапада ў Віцебскай дзяржаўнай акадэміі ветэрынарнай медыцыны. Пра гэта карэспандэнту БЕЛТА паведаміў прарэктар ВНУ па выхаваўчай рабоце, кандыдат ветэрынарных навук, дацэнт Віталь Вяліканов. Права на правядзенне конкурсу ў бягучым годзе Віцебская акадэмія атрымала па выніках леташняга фіналу, які праходзіў у расійскім Арэнбургу і завяршыўся перамогай віцебскай студэнткі Марыі Вялічка. На конкурс у Віцебск плануюць прыехаць 14 прыгажунь з ВНУ аграрнага профілю Расіі, Украіны, Казахстана і Беларусі. Віцебскія арганізатары падрыхтавалі для ўдзельніц цёплы прыём, цікавую праграму і дадатковыя ўзнагароды па выніках конкурсу. Цырымонія падвядзення вынікаў і ўзнагароджанне пераможцаў конкурсу стане ўпрыгожаннем урачыстасці з нагоды 250-годдзя ветэрынарнай адукацыі, якое Віцебская акадэмія адзначыць 5 лістапада ў канцэртнай зале "Віцебск". Журы трэба будзе вызначыць уладальніцу галоўнага тытула конкурсу "Міс СНД-2011", 1-ю і 2-ю віцэ-міс, а таксама пераможцаў у шасці спецыяльных намінацыях, у тым ліку "Міс чароўнасць", "Міс творчасць". Арганізатары завяршаюць перамовы з заслужанымі дзеячамі культуры і мастацтва, якім прапанавана ўвайсці ў склад журы. Прэтэндэнткі на шляху да фінальнай цырымоніі будуць раскрываць свае таленты ў пяці конкурсных выпрабаваннях. Дзяўчаты правядуць самапрэзентацыю, пазнаёмяць з традыцыямі, прыгажосцю і культурай роднага краю праз дэманстрацыю нацыянальнага касцюма. Ім трэба будзе вытрымаць "хвіліну славы", падчас якой трэба максімальна раскрыць творчы патэнцыял. Таксама пройдзе дэфіле ў прафесійным касцюме і вячэрнім уборы. Мерапрыемства арганізуе Віцебская ордэна "Знак Пашаны" дзяржаўная акадэмія ветэрынарнай медыцыны пры падтрымцы прафсаюза работнікаў АПК і ГА "БРСМ". Заснавальнікамі конкурсу выступаюць Харкаўская дзяржаўная зааветэрынарная акадэмія, Белгародская дзяржаўная сельскагаспадарчая акадэмія і Данскі дзяржаўны аграрны ўніверсітэт.-0-

БЕЛТА