9 ліпеня, Віцебск /Вольга Багачова - БЕЛТА/. Крызісны цэнтр адкрываецца сёння ў Полацкім раёне, паведаміла карэспандэнту БЕЛТА дырэктар Тэрытарыяльнага цэнтра сацыяльнага абслугоўвання насельніцтва Полацкага раёна Святлана Касьянава. Аб'ект створаны пры аддзяленні адаптацыі і рэабілітацыі ТЦСАН і прызначаны для аказання псіхалагічнай і іншай дапамогі грамадзянам, у першую чаргу, жыхарам раёна, якія апынуліся ў небяспечным для здароўя і жыцця стане, звязаным з канфліктамі ў сям'і, сямейным гвалтам, якія сталі ахвярамі гандлю людзьмі. Таксама ў значнай ступені крызісны цэнтр арыентаваны на бацькоў, пазбаўленых апекі над дзецьмі. "Цэнтр створаны ў гарадскім пасёлку Фарынава побач з дзіцячым прытулкам, куды змяшчаюцца непаўналетнія пасля адбору з біялагічнай сям'і. Каб не губляць сувязі з дзецьмі, маці (бацькі) зможа на тэрмін да дзесяці дзён застацца ў нашым цэнтры. За гэты час ёй будзе аказана неабходная дапамога спецыялістаў у пераадоленні псіхафізічных праблем", - адзначыла Святлана Касьянава, выказаўшы ўпэўненасць, што блізкасць да дзіцяці, магчымасць зносін з ім станоўча адаб'юцца на вырашэнні сітуацыі, якая ўзнікла. Наватараскі падыход да працы ТЦСАН, які падтрымліваецца мясцовымі ўладамі, знаходзіць водгук у жыхароў раёна. Так, з красавіка тут працуе брыгада "пчолак", мэтавай аўдыторыяй якой з'яўляюцца адзінокія пажылыя людзі. Новая сацыяльная паслуга была ўведзена тэрытарыяльным цэнтрам сацыяльнага абслугоўвання насельніцтва Полацкага раёна пасля вывучэння патрэбы ў ёй і меркавання грамадзян. У асноўны склад каманды ўваходзяць сацыяльны, медыцынскі работнікі і цырульнік. Падбор яшчэ двух "пчолак" ажыццяўляецца на аснове пажаданняў чалавека, да якога спяшаецца каманда, - з ліку членаў мясцовай ветэранскай арганізацыі, актывістаў БРСМ, Чырвонага Крыжа, супрацоўнікаў сацыяльнай службы і г.д. Пры супадзенні інтарэсаў і магчымасцей "пчолкай" можа аказацца любы чалавек, якога пажадаў убачыць пажылы чалавек. Так, запрошанымі гасцямі за мінулы час ужо паспелі пабываць участковыя, старэйшыны вёсак, сяброўкі-сябры-родзічы з суседніх вёсак, святары.