Лепельчане прынялі ўдзел у V абласным турыстычным злёце ветэранаў вайны ў Афганістане

На тэрыторыі аздараўленчага лагера «Спартакавец» у Віцебскім раёне адбыўся V абласны турыстычны злёт ветэранаў вайны ў Афганістане, у якім актыўны ўдзел прынялі і лепельчане.

На гэты раз ужо традыцыйнае мерапрыемства было прысвечана Году міру і стваральнай працы і набліжэнню знамянальнай даты – 35-годдзю вываду савецкіх войскаў з Афганістана, якое будзе адзначацца 15 лютага 2024 года.

На сустрэчу з баявымі таварышамі прыехалі воіны-інтэрнацыяналісты з усіх раёнаў Віцебскай вобласці, а гэта больш за 100 чалавек, а таксама з горада Ступіна Маскоўскай вобласці і Мядзельскага раёна Мінскай вобласці.

У пачатку мерапрыемства з прывітальным словам да ўдзельнікаў звярнуўся старшыня Савета Грамадскага аб'яднання «Беларускі саюз ветэранаў вайны ў Афганістане» Валерый Гайдукевіч, які адзначыў, што такія злёты праходзяць толькі ў Гомельскай і Віцебскай абласных арганізацыях, і гэту традыцыю трэба развіваць. Таксама пажадаў усім бескампраміснай барацьбы і перамогі наймацнейшай камандзе.

Прыемна, што на злёт разам з ветэранамі прыехалі і прадстаўнікі юнага пакалення, якія з задавальненнем удзельнічалі ў конкурсах, падтрымлівалі сваіх бацькоў і дзядоў. А бо гэта выдатная традыцыя ў плане патрыятычнага выхавання і пераемнасці пакаленняў, таму што Беларускі саюз ветэранаў вайны ў Афганістане заўсёды ставіць перад сабой задачу – захаваць і перадаць маладому пакаленню памяць аб гераічных учынках савецкага народа.

На працягу некалькіх дзён воіны-інтэрнацыяналісты ўдзельнічалі ў розных конкурсах і спаборніцтвах, дэманстравалі свае творчыя, спартыўныя таленты, абменьваліся вопытам патрыятычнага выхавання моладзі.

Акрамя гэтага, адбыўся кулінарны конкурс, пасля падвядзення вынікаў якога за агульным сталом каманды прадэгуставалі прыгатаваныя стравы пад сяброўскія гутаркі.

З цеплынёй успамінаюць заўсёды ветэраны сустрэчу баявых сяброў увечары ля «Вогнішча дружбы», дзе мужчыны дзеляцца сваімі ўражаннямі аб злёце, надзённымі пытаннямі і праблемамі, успамінаюць мінулае, абменьваюцца кантактамі.

Не было роўных нашай камандзе ў спартыўным спаборніцтве па перацягванні каната. Як вядома, тут адна схватка можа доўжыцца да 5 хвілін, і ўвесь гэты час спартсмены павінны

трымацца на мяжы сваіх сіл. Калі хоць адзін расслабіцца — прайгралі. У гэтым этапе спаборніцтва ўдзельнікі павінны быць не толькі моцнымі, але і вельмі вынослівымі. Акцэнтую ўвагу, што ў нашай камандзе былі ўдзельнікі розных узростаў, і самаму старэйшаму з іх — 70 гадоў, але воля да перамогі ўсё роўна дапамагла стаць лідарамі.

Таксама 1 месца лепельчане занялі ў творчым конкурсе. Музыкант Міхаіл Тарасаў са сваёй пранікнёнай патрыятычнай песняй, можна сказаць, «узарваў залу». Апладзіравалі нашаму земляку не толькі тыя, хто хварэў за нашу каманду, але і сур'ёзныя супернікі.

У выніку зборная Лепельска-Лёзненская каманда па выніках спаборніцтваў заняла ганаровае 3-е месца.

Для ўдзельнікаў таксама была арганізавана і насычаная культурная праграма. Воіны ўшанавалі памяць загінуўшых воінаў-інтэрнацыяналістаў ля помніка «Боль» у Віцебску, наведалі экспазіцыю музея воінаў-інтэрнацыяналістаў, пабывалі ў Горадзе майстроў, дзе адчулі непаўторную атмасферу фестывалю «Славянскі базар у Віцебску».

–- Турзлёт, які ўжо стаў традыцыйным у нашай вобласці, дапамагае ўмацаваць дружалюбныя сувязі паміж нашымі арганізацыямі, дае магчымасць карысна і актыўна адпачыць, умацаваць здароўе, а таксама дапамагае ўдасканальваць патрыятычную працу з маладым пакаленнем. Бо мы ўсе дзялімся досведам, раімся, як лепш праводзіць сустрэчы з падлеткамі, якія мерапрыемствы з імі можна арганізаваць, каб яны засталіся ў душы ў дзяцей і развівалі ў іх патрыятычныя пачуцці да Радзімы, -- адзначыў старшыня Лепельскай арганізацыі ГА «БСВА» Сяргей Крывель. -- Мне вельмі спадабалася сустрэча. Арганізацыя, як заўсёды, на высокім узроўні, але галоўнае, што гэта мерапрыемства — выдатная магчымасць пагутарыць з былымі саслужыўцамі.

Цалкам згодна з Сяргеем Мікалаевічам, бо з кожным годам ветэранаў Вялікай Айчыннай вайны становіцца ўсё менш і менш. А воіны-інтэрнацыяналісты могуць расказаць школьнікам і студэнтам пра сваю службу, таварыства, вайну, прывіць пачуццё любові да Радзімы.

У завяршэнне хочацца адзначыць, што Лепельскі раён двойчы прымаў гасцей турыстычнага злёту ветэранаў вайны ў Афганістане, і наш край заўсёды пакідаў незабыўныя успаміны ў удзельнікаў.

Па матэрыялах газеты "Лепельскі край"